Astana qalasyndaǵy №2 Esil aýdandyq sotynda Seiitqazy jáne Áset Mataevtardyń isi boiynsha sot otyrysy odan ári jalǵasýda. Sotqa shaqyrylǵan kýágerler «Salyq tóleýden jaltardy» degen ekinshi epizod boiynsha sotqa túsinik berýde.
«Men «Ulttyq baspasóz klýby» qoǵamdyq birlestiginde eshqashan jumys istegen joqpyn. Sol sebepten eńbek shartym da joq. Biraq jalaqymnyń ne sebepten «QazTAG»-tan emes, «Ulttyq baspasóz klýby» qoǵamdyq birlestiginen túsip otyrǵanyn bilmedim»,-delingen S. Mataevtyń kelini, «QazTAG» halyqaralyq aqparat agenttigi» JShS-de jazylym boiynsha menedjer bolyp jumys istegen Aida Mataevanyń sotqa bergen jaýabynda. Búgingi sot otyrysyna kýáger qatysa almaǵandyqtan, onyń jaýabyn sýdia Aqbolat Qurmantaev jariia etti.
«2009 jyldan bastap Seiitqazy Mataevtyń usynysymen «QazTAG» HAA JShS-de jazylym boiynsha menedjer bolyp jumys istedim. Ai saiyn 150 myń teńge jalaqy aldym. Biraq «Qazaqstannyń Halyq banki» AQ-nan ashqan kartalyq shotyma jalaqym «QazTAG»tan emes, «Ulttyq baspasóz klýby» qoǵamdyq birlestiginen túsip otyrdy. Nelikten bulai bolǵanyn bilmeimin. Óitkeni, «Ulttyq baspasóz klýbynda» eshqashan jumys istegen joqpyn. Múshelikke ótpegendikten eshqashan múshelik jarna tólegen emespin. Alaida is júzinde qoǵamdyq birlestiktiń iesi S. Mataev ekenin bildim», -delingen kýágerdiń sotqa bergen túsiniginde.
Bankten alynǵan qujatqa sáikes, Aida Mataevanyń kartalyq shotyna 2011 jyly 1 mln 903 myń teńge, 2012 jyly 1 mln 217 teńge aýdarylǵan. Ol bul aqshany dúkenderden kiim satyp alýǵa jáne basqa da jeke qajettilikterine jumsaǵan. Mysaly, bir joly dúkenge 446 myń 426 teńge, endigi bir joly 111 myń 260 teńge jumsaǵanyn rastady. Eske sala ketsek, aldyńǵy sot otyrysynda aýditorlyq tekseristiń nátijesinde Seiitqazy Mataevtyń «Ulttyq baspasóz klýby» qoǵamdyq birlestiginiń esebinen 269 mln. astam teńge bólip, óziniń týystary men qyzmetkerleriniń dúkender men meiramhanalardaǵy shyǵyndaryna demeýshilik jasaǵany aityldy.
Aýditor Evgenii Iýnýsov biznes-aýdittik tekseristiń nátijesinde 2005 jyldyń 1-inshi qańtarynan 2016 jyldyń 25-inshi aqpanyna deiingi aralyqta bankten jalpy somasy 606 mln. 809 myń 785 teńge alynǵanyn, sonyń ishinde Seiitqazy Mataevtyń túbirtek kitapshasynan 474 mln 369 myń 155 teńge alynǵanyn aitqan bolatyn. Al keshegi otyrysta sotqa túsinik bergen «Sberbank» AQ-nyń Almaty qalasyndaǵy menedjerleri «Ulttyq baspasóz klýby» qoǵamdyq birlestiginiń shotynan aqshany jalǵyz Seiitqazy Mataevtyń alyp kelgenin rastady.
Atap aitarlyǵy, bankten alynǵan iri kólemdegi qarajattyń qolma-qol aqshaǵa ainaldyrylǵanyn Astanadaǵy sot saraptamasy ortalyq institýtynyń sarapshysy Baýyrjan Rysqaliev te rastady. Onyń esebine sáikes, 2010-2015 jyldary Bailanys, aqparattandyrý jáne aqparat komiteti men «QazTAG» halyqaralyq aqparat agenttigi» JShS-gi memlekettik saiasatty aqparattyq jaryqtandyrýǵa jalpy somasy 169 mln. teńgege shart jasaidy. Saraptamanyń nátijesinde belgili bolǵandai, 2010-2015 jyldary Seiitqazy Mataev 474 mln 369 myń 155 teńgeni qolma-qol aqshaǵa ainaldyrǵan. Sonyń ishindegi 55 mln. teńgesi memlekettik aqparattyq tapsyrys aiasynda aýdarylǵan qarajat ekeni anyqtaldy.
Ámirlan Álimjan.
