Otandyq saiasattanýshy Rasýl Jumaly «Nur Otan» partiiasynyń praimerizi eldiń saiasi júiesine jańa serpin alyp kelgenin aitady. Endi halyqtyń taǵdyryn sheshetin depýtattyq oryndarǵa kezdeisoq adamdar emes, praimerizdiń súzgisinen ótken, halyqtyń aldynda óziniń qarym-qabiletin dáleldei alǵan myqtylar otyrady deidi ol.
Eske salaiyq, búgin Shymkent qalalyq «Nur Otan» filialynyń kezekten tys konferentsiiasy kezinde Máslihattyń partiialyq tizimi ázirlenip, Parlament Májilisiniń partiialyq tizimine úmitkerler anyqtaldy. Taldaý kórsetkendei, tizimdegi áielderdiń úles sany 3 ese artyp, 11-den 30%-ke deiin, al 35 jasqa deiingi jastar 0-den 20%-ǵa deiin jetken. Úmitkerlerdiń ortasha jasy 49-dan 44 jasqa deiin tómendedi. Qyzmettegi depýtattardyń ishinen 8 adam ǵana jańa tizimge engizilgen.
«Buǵan deiin jabyq esik jaǵdaiynda ákimge kim jaqsa sol ótip ketetin tizim endi ashyq ta básekelestik ahýalynda jasaqtalýda. Bul eldiń máselelerin sheshetin mańyzdy oryndarǵa kezdeisoq, kópshilik tani bermeitin adamdar emes, Praimeriz súzgisinen ótip qabiletin dáleldei alǵan azamattar keledi degen sóz. Olai bolsa qabyldanatyn sheshimderdiń sapasy da artyp, halyqtyń oiynan shyǵýyna negiz paida bolady. Al jalpy alǵanda on jyldap ózermeitin quram 70 paiyzǵa jańaratyn boldy. Osynyń bári aldaǵy sailaýda Nur Otan basymdyqqa qol jetkizip jatsa, Maslihat jumysyna oń serpin bermek», - dep jazdy Rasýl Jumaly óziniń Facebook-paraqshasynda.
Konferentsiia barysynda Májilistegi partiialyq tizimge úmitkerler arasynda pikirsaiystar ótti. 8 úmitkerdiń ishinen partiialyqtar «Praimeriz» aqparattyq júiesi arqyly qalalyq ókildik kvotasyna sáikes 4 úmitkerdi tańdady.
Parlamenttiń tómengi palatasynyń qyzmettegi depýtaty Berik Ospanov, qalalyq máslihattyń hatshysy Ǵani Tashqaraev, kásipodaq tóraǵasy Berik Bekjanov jáne mektep-internat direktory Jadyra Tańatarova eń kóp daýys jinady.
Filial tóraǵasy, qala ákimi Murat Áitenovtiń aitýynsha, praimeriz kezinde turǵyndardan túsken 685 usynystyń 98% Shymkent qalasynyń sailaýaldy baǵdarlamasynda kórinis tapty.
