Máslihattar qazaqtyń ulttyq saltyna negizdelip qurylǵan. Bul týraly Qazaqstan máslihattarynyń 25 jyldyǵyna arnalǵan respýblikalyq konferentsiiada Túrkistan oblystyq máslihatynyń ardageri Shalatai Myrzahmetov aitty, dep habarlaidy "Ult aqparat".
«Máslihat degen sózde tereń uǵym jatyr. Qazaq bir aýyz sózben el taǵdyryn, er taǵdyryn sheshe bilgen. Qandai bir kezeń bolǵanda da, balalar ýájdi sózge toqtaǵan. El taǵdyry talqylanýy kerek bolsa, er taǵdyry tarazyǵa tússe, babalar mindetti túrde máslihat qurǵan. Osydan shirek ǵasyr buryn asa qurmetti Elbasymyz, Tuńǵysh Prezidentimiz jergilikti keńester ornynan jergilikti máslihattardy ómirge engizgende qazaqtyń ulttyq saltyn eskergen bolýy kerek. Ulttyq rýhtyń kóterilýiniń alǵysharty retinde oilastyrǵan bolsa kerek. Jergilikti máslihattyń bizdiń memleketimizdiń zaiyrly, demokratiialyq negizde qalyptasýyna qosatyn úlesi orasan. Óitkeni, ol - halyq ókilderi. Ol jergilikti halyqtyń tynys-tirshiligin jaqsy biledi. Ne kerek ekenin durys paiymdai alady jáne ony atqarýshy bilikke jetkizip, birlese otyryp, durys sheshim qabyldanýyna úles qosady», - dedi ol.
Al Soltústik Qazaqstan oblystyq máslihatynyń hatshysy Vladimir Býbenko aimaqtyń áleýmettik-ekonomikalyq damýy men qoǵamdy demokratiialandyrýdaǵy máslihattardyń depýtattyq korpýsynyń róli jaiynda sóz qozǵady.
«Búginde máslihattar biliktiń bir tarmaǵy bolyp qana qalyptasqan joq. Ol memlekettik negizgi organdardyń birine, demokratiialy jáne quqyqtyq memleket qurýdyń basty institýttarynyń birine ainaldy. Jergilikti ózin-ózi basqarý organdary arqyly halyqqa jergilikti mańyzy bar máselelerdi derbes ári zor jaýapkershilikpen sheshýge septigin tigizip keledi», - dedi ol.
