Qazaqstan aimaqtaryndaǵy máslihat depýtattary turǵyndarmen belsendi jumys isteýi kerek. Bul týraly Nur Otan partiialyq baqylaý komitetiniń otyrysynda partiia tóraǵasynyń birinshi orynbasary Baýyrjan Baibek aitty, dep habarlaidy "Ult aqparat".
«Búgingi tańda aimaqtyq quramdy kúsheitý kerek. Máslihat depýtattary belsendi bolǵany durys. Ókinishke qarai, aimaq turǵyndary olardyń bárin tani bermeidi. Sebebi olar ózekti máselelerdi belsendi túrde kóterip jatqan joq. Al bul jerde memleket basshysy men partiia alǵa qoiǵan mindetterdi júzege asyrý áleýeti joǵary», - deidi Baýyrjan Baibek.
Ol Nur Otan partiiasy azamattardyń senimin aqtap, alǵa qoiǵan mindetterdi abyroimen atqarýy kerektigin aitty.
«Bizdi kóp ózgeris kútip tur. Basqarýshy partiia retinde óte ábjil qozǵalýymyz kerek. Qazirgi ýaqytta sailaýshylardyń senimine kirý ońai emes. Azamattardyń pikiri jyldam ózgeredi, oǵan áleýmettik jeliler de aitarlyqtai áser etýde. Ár adam ózine «Partiia maǵan ne beredi?» degen suraq qoiady», - deidi ol.
Partiia tóraǵasynyń birinshi orynbasarynyń sózinshe, áleýmettik jeli qoldanýshylary qoǵamdyq jumys qalai atqarylyp jatqanyn jaqsy biledi.
«Sondyqtan máslihat depýtattarynyń áleýmettik jelini qoldana bilýi óte mańyzdy. Bul – sailaýshymen tikelei bailanysta bolý múmkindigi. Áleýmettik jeli arqyly qandai másele týyndap jatqanyn bilip, ony jyldam sheshýge bolady», - deidi Baýyrjan Baibek.
