Reseidiń Syrtqy saiasat arhivinde XVII-XIX ǵasyrlarda jazylǵan qazaq handarynyń hattary saqtalǵan, dep habarlaidy QazAqparat.
Bul týraly Qoljazbalar jáne sirek kitaptar ulttyq ortalyǵynyń direktory J.Boldykov bastaǵan top Arhiv isteri jáne qujattamany basqarý komitetiniń qoldaýymen Reseidiń Máskeý qalasyna saparynda belgili boldy. «Arhiv-2025» josparyn iske asyrý maqsatyndaǵy issaparda mamandar ondaǵy arhivter men kitaphanalardaǵy Qazaqstan tarihyna qatysty qundy derekterdi elge ákeledi.
Qazirgi tańda ortalyq direktory, PhD doktor J.Boldykov pen ǵylymi qyzmetkerler K.Parimbekova, G.Bisenova, Z.Dúkenbaeva, G.Ótepova, N.Abeldinovter saqtalǵan mańyzdy qujattardy zerttep-zerdeleýde.
«Zertteýshiler elimizdiń tarihyna qatysty jazba muralar men qundy qujattar tapqan. Atap aitqanda, Resei memlekettik kitaphanasynan el tarihyna qatysty 47 myńǵa jýyq ádebiet, Resei memlekettik tarihi-kópshilik kitaphanasynan HVII ǵasyrǵa tiesili litografiialyq kitaptar men sirek jazba muralar anyqtaldy. 4 ǵasyrlyq tarihy bar Resei memlekettik áskeri-tarihi arhiviniń qoryn zertteý barysynda jer máselesine qatysty qujattar, kartalar men buiryqtar belgili boldy. Al Syrtqy saiasat arhivinde XVII-XIX ǵasyrda jazylǵan qazaq handarynyń hattary saqtalǵan», - delingen vedomstvo habarlamasynda.
