Juma kúni «Sheremetevo» Máskeý halyqaralyq áýejaiynda «S-1» terminalynyń resmi ashylýy boldy, dep habarlaidy QazAqparat.
«S-1» tek halyqaralyq reisterge qyzmet kórsetetin bolady. Alǵashqyda munda «Aeroflottyń» barlyq reisteri aýystyrylady. Terminal jylyna 20 millionǵa jýyq jolaýshyǵa qyzmet kórsetýge qaýqarly. Onyń ashylýymen áýejaidyń ótkizý múmkindigi jylyna 80 million adamǵa deiin artady. 2024 jyldan keiin Sheremetevoda terminaldyń ekinshi kezeńi - «S-2»-niń qurylysyn (jylyna 10 mln jolaýshy) bastaý kózdelgen.
«S-1» terminalynda jolaýshylardy tirkeitin 84 oryn bar. Biometriialyq tólqujattardyń ielerin azamattyń qatysýynsyz ótkizetin avtomatty pasporttyq baqylaý beketi qarastyrylǵan.
Sondai-aq 2,5 myń mashinaǵa arnalǵan alty qabatty parking jumys isteidi.
Ashylý saltanatynda «Sheremetevo» Halyqaralyq áýejaiynyń» Direktorlar keńesiniń tóraǵasy Aleksandr Ponomarenko terminaldyń qurylysyna 32 mlrd rýbl (196 mlrd 160 mln teńge) jumsalǵanyn atap ótti.
Áýejaida Aqparattyq habarlandyrýdyń avtomatty júiesi engizilgen. Máselen, nysannyń tórt terminalynda (C, D, E jáne F) reistiń ushý baǵytyna bailanysty aqparat orys, aǵylshyn jáne qazaq tilderinde aitylady. Onymen qosa, barlyq dybystyq habarlandyrýlar áýejaida ornatylǵan monitoringte júgirtpe jolda kórsetilip otyrady.
