Máskeýde Qazaqstan Respýblikasynyń Táýelsizdik kúnine orai saltanatty qabyldaý ótti, – dep habarlaidy «Ult aqparat» Qazaqstan elshiligine silteme jasap.
Resei astanasynyń «Lotte Moskva» atty qonaq úiinde Qazaqstan Respýblikasynyń Táýelsizdik kúnine arnalǵan saltanatty qabyldaý keshi ótti. Osy keshtiń mártebeli meimandarynyń arasynan Resei Federatsiiasy prezident ákimshiligi, úkimettiń jáne Syrtqy ister ministrliginiń ókilderi, álemniń túkpir-túkpirinde ornalasqan memleketterdiń diplomatiialyq korpýs jetekshileri jáne halyqaralyq uiymdar, ǵalymdar men mádeniet qairatkerleri, tanymal qazaq-resei juldyzdary jáne qazaq diasporasynyń ókilderi boldy.
Dástúr boiynsha kesh Qazaqstan Respýblikasynyń Resei Federatsiiasyndaǵy Tótenshe jáne Ókiletti Elshisi Imanǵali Tasmaǵambetovtiń saltanatty quttyqtaýymen ashyldy. Ol óz sózinde otanymyzdyń táýelsizdik tuǵyryn 28 jyl ishinde barlyq álemdik qaýymdastyq jáne etnostar ókilderi moiyndaǵanyn atap ótti. Onyń sózinshe, Qazaqstandy shet elderde toleranttylyqqa, konfessiialyq jáne mádeniaralyq kelisimge qol jetkizýge baǵyttalǵan dáiekti ishki saiasat júrgizetin memleket dep biledi.
«Qazaqstan josparlanǵan ekonomikadan básekege qabiletti naryqtyq ekonomikaǵa kóshý úrdisin sátti ótkizdi jáne bul júieniń barlyq tetikteri men zańnamalyq negizderin qurastyra bildi. Qazaqstan eýraziialyq keńistiktegi integratsiianyń lokomotivi bolyp tabylady. Elimizdiń qarqyndy damýy memleketke ómirdiń barlyq salalaryn odan ári reformalaýǵa múmkindik beredi», - dep atap ótti diplomatiialyq missiianyń basshysy. Sóziniń sońynda ol Qazaqstan halqyn Táýelsizdik kúnimen quttyqtap, barlyǵyna baqyt pen zor densaýlyq tiledi.
Óz kezeginde Resei Federatsiiasy Syrtqy ister ministriniń orynbasary Aleksandr Pankin búgingi tańda Qazaqstan damyǵan ekonomikasy men halyqtyń ómir súrý deńgeii, mádeni kelbeti aiqyn, zamanaýi, demokratiialyq, kópultty memleket ekendigine nazar aýdardy.
«Resei men Qazaqstan halyqtary tatý kórshiler retinde ómir súrip, ekonomikalyq jáne áleýmettik damý máselelerin birlese sheshedi, týyndaǵan qiyndyqtardy birge jeńedi. Baýyrlas Qazaqstan halqyna barlyq jaqsylyqtardy tileimin», - dep qorytyndylady Aleksandr Pankin. Sonymen qatar, bul keshte ár jerden Qazaqstan halqyna joldanǵan quttyqtaýlar estildi.
Saiasattanýshy, Kaspii yntymaqtastyǵy institýtynyń direktory Sergei Miheev táýelsiz Qazaqstannyń basty jetistigi - bul kedergisiz turaqty damý ekenine senim bildirdi.
«Bizdiń qiyn-qystaý kezeńimizde úzdiksiz alǵa qadam basý – onyń ózi úlken jetistik. Qiyndyqsyz turaqty damýdy qamtamasyz etetin Qazaqstan úshin bul postkeńestik keńistiktegi jáne odan tys aimaqtar úshin de sátti úrdis. Sondyqtan men Qazaqstan halqyn merekemen quttyqtaimyn jáne barlyǵyńyzǵa jaqsylyq tileimin».
Maqtan tutar azamattarymyzdyń biri, kinorejisser Timýr Bekmambetov te óz jerlesterin merekemen quttyqtady.
«Týǵan jerimde bolmaǵanym úshin ókinemin, biraq janymmen árqashan sizdermen birgemin. Barlyqtaryńyzǵa tek sáttilik tileimin, al qalǵanyn adamdar ózderi sheshedi» - dedi ol.
Saltanatty qabyldaý barysynda qonaqtar tek pikir almasyp qana qoimai, sonymen birge birneshe saǵat boiyna Qazaqstanǵa saiahatqa shyǵa aldy. Mundai múmkindikti qonaqtarǵa Serik Zakariia jetekshilik etetin «Araily Aqtóbe» folklorlyq ansambliniń ártisteri, qazaqstandyq sýretshiler men áigili músinshi Marat Ǵabdrahmanovtyń kórmesi syi etti. Is-sharanyń sharyqtaý shegi qazaqtyń ulttyq taǵamdarymen tanysý boldy. Qonaqtarǵa túrli taǵamdar men sýsyndar usynyldy. Sondai-aq, kesh qonaqtarynyń bári fotosessiiaǵa qatysty.
