Álemge áigili qazaq ánshisi, tańǵajaiyp daýys iesi Dimash Qudaibergenniń jeke kontserti 22-23 naýryzda Máskeýdegi Kreml saraiynda dúrkirep ótti.
Jas ánshiniń Máskeýdegi alǵashqy kontsertin álemniń 56 elinen kelgen kórermender tamashalady. Sondai-aq qazaqstandyq jáne reseilik tanymal tulǵalar Dimashqa qoldaý kórsetý úshin án keshine arnaiy qatysqan.
Kesh qonaqtary arasynda RF úkimetiniń basshysy Dmitrii Medvedevtiń áieli Svetalana Medvedeva bolyp, qazaq ánshisine óz qolymen gúl syilady. Osy sáttiń videosyn jelide reseilik tanymal telejúrgizýshi Angelina Vovk jariialapty.
"22 naýryz kúni Memlekettik Kreml saraiynda Dimash Qudaibergenniń erekshe kontserti dúrkirep ótti. Basynda mundai kontsertke, Dimashtyń ónerine sengen joqpyn. Alaida úshinshi týyndydan soń onyń bolashaqta álemdik deńgeidegi juldyz bolatynyna kózim jetti. Birtýar ánshi. Daryndy, intelligent, rýhani bai tulǵa jáne naǵyz kásibi ártis. Ózi nebári 24 jasta", - dep Vovk Instagram paraqshasyndaǵy oqyrmandaryna keshten alǵan shynaiy áserin jetkizdi.
Dimash Qudaibergenniń jeke án keshin tamashalaǵan basqa da juldyzdar jeli arqyly jas ánshige degen erekshe qurmeti men júrekjardy lebizderin bildirip jatyr.
Reseilik tanymal ánshi Anita Tsoi Dimash úshin óz týryn ádeii toqtatyp, kontsertke arnaiy ushyp kelipti.
"Qurmetti Dimash, búgin sen úshin tolqynysqa toly kún - Kreml saraiynda alǵashqy jeke kontsertińdi berdiń. Mundai sahnada óner kórsetý qiyn ári jaýapty is. Zalǵa dúnie júzinen jinalǵan tyńdarmandaryń lyq tolǵanyn kórip qýandym. 56 elden kelgen jankúierler klýbynyń árqaisysy óz eliniń týyn jelbiretip, senimen birge án aityp, ár qimylyńa tánti bolyp otyrdy. Men de óz týrymdy toqtatyp, seniń kontsertiń úshin Máskeýge ádeii ushyp keldim. Resei jerindegi debiýtyńmen shyn júrekten quttyqtaimyn. Ózińe berilgen erekshe daýysyńda saqta, baqytty bol! Jańa shyǵarmashylyq tabys tileimin, dosym!" - dep jazady Tsoi Instagram paraqshasynda.
Jas qazaq ánshisiniń ónerin tamashalaýǵa reseilik tanymal ártis Boris Moiseev te barypty. Dimashpen birge túsken sýreti onyń Instagram jelisindegi resmi paraqshasynda jariialandy.
Dimashpen birge óner kórsetken ártister tanymal ánshiniń daryny men adamgershiligine tánti bolǵanyn jasyrmady. Todes ártisi Sofiia Lazareva Máskeýdegi eki kontserttiń joǵary deńgeide ótkendigin jazǵan.
"Mundai erekshe daryndy ártis ári talantty ánshi Dimash Qudaibergenmen birge jumys isteý keremet boldy. Erekshe kóńil-kúi syilady. Ánderi júregime jol tapty. Kórermen úshin án shyrqaityn oryndaýshy. Óziniń otbasy, ustazdary men halqyna asa qurmet kórsetedi. Eki kontsert jáne lyq toly Kreml zaly, qoldaý kórsetip jatqan tyńdarman. Bul adamdy eliktirip, kúsh syilaidy. Erekshe áserde qaldym. Osyndai kezde óz isińdi súietinińdi túsinesiń", - dep jazady Lazareva.
Dimash Qudaibergenge qoldaý kórsetý úshin Máskeýdegi alǵashqy kontsertine ádeii ushyp barǵan qazaqstandyq belgili tulǵalar men estrada juldyzdary da jeterlik.
Solardyń biri Ainur Tursynbaevanyń aitýynsha, álemniń túkpir-túkpirinen Dimashty izdep júrip keletin jankúierler kóp, olardyń qasynda myna turǵan Máskeýge jete almaý uiat bolyp sanalady.
"Keldik, kórdik, súisindik! Dalada ary-beri júgirgen orystardyń "Dimashtyń kontsertine bilet bar ma?!" dep qapylyp júrgenin kórdik. Qyzyl alańdy qorshaǵan qyzyl ásker Dimashtyń kontserti úshin qyzmet qylǵanyn kórdik. Kremldiń aýzy murnynan shyqqan xalyq qazaqtyń ánine qosylyp turǵanyn kórdik. Qytai, aǵylshyn, túrikterdiń "Daididaýdy" tyńdap jylaǵanyn kórdik. 6 myń xalyqtyń bizdiń dombyranyń únine tik turyp qol soqqanyn kórdik. Igor Krýtoi, Anita Tsoi bastaǵan dúldúlderdiń Dimashqa qurmet kórsetkenin kórdik. Imanǵali aǵamyz bastaǵan el azamattarynyń Dimash úshin marqaiyp turǵanyn kórdik", - dep jazdy aitysker aqyn.
Kontsert bitken soń da 1 saǵat boiy tarqamai turyp alǵan xalyqty kórgen kezde, álemge aty ketken barmaqtai balamyz úshin kózimizge jas kelip, duǵa qyldyq, deidi Tursynbaeva.
Áleýmettik jelidegi postyn aitysker aqyn Dimashqa degen jyly sózderimen aiaqtady.
"Appaq bolǵan baladan ainaldyq! Seni týǵan anadan ainaldyq! Jerdi jarǵan daýysyńnan ainaldyq! Eldi oiatqan namysyńnan ainaldyq! Súp-súikimdi túrińnen ainaldyq! Baldan tátti tilińnen ainaldyq! Elge degen tilegińnen ainaldyq! Judyryqtai júregińnen ainaldyq! Jasai ber, qazaqtyń balasy! Jasai ber, Dimash!", - dedi Ainur Tursynbaeva.
Sonymen qatar, "Qazaqstan" RTRK basqarma basshysy Erlan Qarin Dimash Qudaibergenniń kontsertine qatysyp, Instagram paraqshasynda keýdesin kernegen maqtanysh sezimimen bólisti.
"Búgin Máskeýde qazaqtyń óneri, rýxy asqaqtady! Dimash Reseidiń eń úlken saxnasyna shyǵyp, óz ónerimen jurtty taǵy bir súisindirdi! Kóshe tolǵan qazaq, bári birin biri quttyqtap jatyr, óitkeni Dimash óz eliniń, xalqynyń atyn, abyroiyn taǵy bir kóterip jiberdi. Keremet sezim, keremet áser! Raxmet, Dimash!", - dep Qarin jas ánshige alǵysyn bildirdi.
Qazaqstandyq tanymal ánshi Erke Esmahannyń da Máskeýge saparynyń birinshi sebebi Dimashtyń kontserti bolǵan eken.
"Dimashtyń kontsertiniń áseri áli tarqamady! Álemniń túkpir- túkpirinen kelgen jankúierlerdi kórdim! Qazaqtyń qara dombyrasy kúmbirlegende, ózge ult ókilderiniń ornynan turyp qoshemet jaýdyrǵanyn kórdim! Allaǵa sansyz shúkir! Dimash ekeýmiz tálim alǵan Aqtóbedegi ustazymyz Marat Aitimov aǵaiymdy shákirtimen dýet oryndaǵanyn Kreml saxnasynan kórip, qatty qýandym", - dep Erke áleýmettik jelidegi jazbasyn Dimashqa degen izgi tilekterimen aiaqtady.
Dimashtyń Máskeý qalasyndaǵy Kreml saraiynda eki kúngi anshlagpen ótken kontsertin belgili júrgizýshi ári akter Azamat Satybaldy da tamashalapty.
"Kontsert barysynda san túrli áser aldym. Eń bastysy maqtandym, ortasynda qýanyshtan kózime jasta keldi jasyratyny joq. Jambyl atamyz namaz oqyǵan Kremlde san jyldan keiin Dimashymyzdyń kontsert berýi maqtanysh ekeni sózsiz", - dep jazdy Azamat áleýmettik jelidegi paraqshasynda.
Tanymal akter moiyndaǵandai, sheteldik kórermender "Dimashi" dep aiqaiǵa basqanda, otandasymyzdy ishtei qyzǵanyp, atyp turyp "ol bizdiń Dimashymyz" dep aitqysy kelgen eken. Sonymen birge, sheteldik jankúierler qazaqtardan kóp bolǵanyn ókinishin jasyrmai, elimizdiń jaryq juldyzyn barynsha baǵalaý kerek ekenin atap aitty.
"Qazaqta Qudaiǵa shúkir talanttar jeterlik, biraq Dimash Qudaibergenov - jalǵyz. Óitkeni Dimash, ol - qubylys. Ony solai qabyldaý kerek. Eń bastysy, til-kózden saqtasyn. Meniń baiqaǵanym - bul tek basy ǵana. Qudai qalasa Dimashymyz talai biikti baǵyndyrary sózsiz. Qazaqtyń atyn álemge tanytar ul-qyzdarymyz kóp bolsyn", - dep oiyn túiindedi akter.
Oqi otyryńyz
