Kreml mektepterde tildi oqytý máselesine qatysty Tatarstannyń pozitsiiasyn qabyldamaidy, Reseidegi az ulttardyń tilin mektepte oqytý burynǵysha qalady. Bul týraly RBK jazady.
Basylymnyń suraǵyna jaýap bergen derekkóz biliktiń mektepterde ult tilderin oqytý isindegi pozitsiiasy ózgermeitinin aitqan.
«Bári zańǵa sáikes bolady – ult tilderi erikti túrde oqytylady. Bul barlyq ulttyq respýblikalarǵa ortaq tártip, eshkimge erekshe jaǵdai jasalmaidy» degen ol.
Muny RBK gazetine Resei prezidentiniń baspasóz hatshysy Dmitrii Peskov ta rastaǵan. «Iá. Shynynda solai» dep qysqa jaýap bergen ol.
Tatarstanda tatar tilin oqytý máselesinen týǵan talas-tartys birneshe aidan beri jalǵasyp keledi.
Respýblika mektepterinde 1 synyptan 9 synypqa deiin tatar tili mindetti túrde oqytylady. Daý Tatarstandaǵy orystildi belsendilerdiń mektepterde tatar tilin mindetti oqytýǵa qarsy shyǵýynan bastalyp, bul orystildi jáne tatartildi ata-analar arasynda urys-keris týǵyzdy.
Shilde aiynda ultaralyq qatynastar keńesiniń otyrysynda Resei prezidenti Vladimir Pýtin tatar tilin oqytý isine qatysty pikir bildirdi.
«Ulttyq tilderdi oqytý – erikti quqyq. Adamǵa týǵan tili emes tildi kúshtep oqytýǵa jáne orys tilin oqytý deńgeii men ýaqytyn tómendetýge jol berilmeidi» dedi ol.
Bir ai ótken soń Pýtin bas prokýratýraǵa aimaqtarda azamattardyń ana tili men ult tilderin oqý quqyǵy qalai qorǵalyp jatqanyn tekserýdi tapsyrdy. Artynsha Tatarstan mektepterinde prokýrorlyq tekserýler bastalǵan. Al tatar tili muǵalimderi arasynda saǵatymyz qysqara ma degen qaýip paida bolǵan.
Budan bir aptadai buryn Tatarstan prezidenti Rýstam Minnihanov tatar tilin respýblika mektepterinde oqytý burynǵysha mindetti bolyp qala beredi dep málimdedi. Alaida, ol tatar tilin oqytý saǵaty aptasyna 5-6 saǵattan eki saǵatqa qysqaratynyn, bul másele federaldy ministrlikpen kelisilgenin aitty.
Al RBK-ǵa suhbat bergen federaldy sheneýnik respýblika mektepterinde tatar tilin oqytýdy mindetti etip qaldyrý isinde Tatarstanǵa kepildik berilgen joq degen.
