Máskeý Tájikstan men Aýǵanstannyń áskerin ortaq shekaraǵa qarai tartýyna alańdap, taraptardy "qiyn jaǵdaidan shyǵý joldaryn izdestirýge" shaqyrdy, dep habarlaidy Azattyq.
Bul týraly 30 qyrkúiekte Máskeýde ótken brifingte Resei SIM aqparat departamenti direktorynyń orynbasary Aleksei Zaitsev málimdedi.
"Tájik-aýǵan qarym-qatynasynyń shielenisýine alańdap otyrmyz. Ortaq shekaraǵa eki eldiń qarýly kúshteri tartyla bastaǵany týraly málimet aldyq. "Taliban" qozǵalysynyń aqparaty boiynsha, shekaraǵa jaqyn Tahor provintsiiasynda ǵana ondaǵan myń sarbaz ornalasqan", - dep málimdedi ol.
Soǵan bailanysty Máskeý Dýshanbe men Kabýldaǵy "Taliban" úkimetin "qiyn jaǵdaidan shyǵý joldaryn izdestirýge" shaqyrdy, deidi Zaitsev.
Tálipter munyń aldynda kórshi elderge qaýip tóndirmeitinin málimdegen. 15 tamyzda "Taliban" sodyrlary Kabýlǵa uryssyz kirdi, Aýǵanstan prezidenti Ashraf Ǵani Birikken Arab Ámirlikterine qashty. Ázirge halyqaralyq qaýymdastyq Aýǵanstandaǵy tálipter biligin moiyndaǵan joq.
