19 qyrkúiekte Resei jáne Ýkraina ókilderi Briýsselde Ýkraina arqyly gaz tasymaldaý máselesin talqylady. Resei jaǵynan kelissózge energetika ministri Aleksandr Novak jáne "Gazprom" kompaniiasynyń basqarma tóraǵasy Aleksei Miller qatysty. Al ýkrainalyq delegatsiia tobyn energetika ministri Aleksei Orjel jáne "Naftogaz" kompaniiasynyń basshysy Andrei Kobolov basqardy.
Kezdesý 40 minýtqa sozyldy. Eki tarap ta kelissóz "konstrýktivti" ótti dep baǵalady. Alaida kelissózde Ýkraina arqyly tasymaldanatyn gaz kólemi aitylmady. Taraptar máseleniń zańnamalyq jaǵyna kóbirek nazar aýdaryp, bir aidan soń kelissózdi jalǵastyrmaq bolyp kelisti.
Qazirgi kelisim-sharttyń merzimi 2019 jyly 31 jeltoqsanda aiaqtalady. Eýrokomissiia buǵan deiin Máskeý men Kievke 10 jylǵa sozylatyn kelisim-shartqa qol qoiýdy usynǵan.
Novak Máskeýdiń kelesi jyldan bastap jańa eýropalyq zańnama boiynsha jumys isteýge daiyn ekenin jetkizgen. Bul zańǵa sáikes, "Naftogaz" kelisim-shart bolmasa da gaz tasymaldaýǵa tiis. Novaktyń aitýynsha, Resei eger Ýkraina 2020 jyldyń basyna deiin eýropalyq normany engizip úlgermese, gaz tasymaldaý boiynsha qysqa merzimdi kelisim-shartqa qol qoiýdy usynǵan.
Al Orjel eki taraptyń jyl sońyna deiin kelisim-shart jasasyp úlgermeýi múmkin ekenin aityp, alaida Ýkraina jaǵy qujatqa qol qoiylady dep úmittenetinin jetkizgen. Resei jaǵy Ýkraina arqyly Eýropaǵa 2020 jyly gaz tasymaldaýdy jalǵastyra beretinine senimdi ekenin atap ótken.
Ýkraina birneshe jyl buryn Reseiden tikelei gaz satyp alýdan bas tartqan. Alaida onyń aýmaǵynan ortalyq jáne ońtústik Eýropaǵa qarai magistraldy gaz qubyry ótedi. Tranzitti toqtatý bul elderdiń gazsyz qalý qaýpin ulǵaita túsedi. Buǵan deiin Germaniia biligi 2019 jyldan keiin de gaz tasymaldaý jalǵasýy tiis dep birneshe ret eskertken.
