19 قىركٷيەكتە رەسەي جەنە ۋكراينا ٶكٸلدەرٸ بريۋسسەلدە ۋكراينا ارقىلى گاز تاسىمالداۋ مەسەلەسٸن تالقىلادى. رەسەي جاعىنان كەلٸسسٶزگە ەنەرگەتيكا مينيسترٸ الەكساندر نوۆاك جەنە "گازپروم" كومپانيياسىنىڭ باسقارما تٶراعاسى الەكسەي ميللەر قاتىستى. ال ۋكراينالىق دەلەگاتسييا توبىن ەنەرگەتيكا مينيسترٸ الەكسەي ورجەل جەنە "نافتوگاز" كومپانيياسىنىڭ باسشىسى اندرەي كوبولوۆ باسقاردى.
كەزدەسۋ 40 مينۋتقا سوزىلدى. ەكٸ تاراپ تا كەلٸسسٶز "كونسترۋكتيۆتٸ" ٶتتٸ دەپ باعالادى. الايدا كەلٸسسٶزدە ۋكراينا ارقىلى تاسىمالداناتىن گاز كٶلەمٸ ايتىلمادى. تاراپتار مەسەلەنٸڭ زاڭنامالىق جاعىنا كٶبٸرەك نازار اۋدارىپ, بٸر ايدان سوڭ كەلٸسسٶزدٸ جالعاستىرماق بولىپ كەلٸستٸ.
قازٸرگٸ كەلٸسٸم-شارتتىڭ مەرزٸمٸ 2019 جىلى 31 جەلتوقساندا اياقتالادى. ەۋروكوميسسييا بۇعان دەيٸن مەسكەۋ مەن كيەۆكە 10 جىلعا سوزىلاتىن كەلٸسٸم-شارتقا قول قويۋدى ۇسىنعان.
نوۆاك مەسكەۋدٸڭ كەلەسٸ جىلدان باستاپ جاڭا ەۋروپالىق زاڭناما بويىنشا جۇمىس ٸستەۋگە دايىن ەكەنٸن جەتكٸزگەن. بۇل زاڭعا سەيكەس, "نافتوگاز" كەلٸسٸم-شارت بولماسا دا گاز تاسىمالداۋعا تيٸس. نوۆاكتىڭ ايتۋىنشا, رەسەي ەگەر ۋكراينا 2020 جىلدىڭ باسىنا دەيٸن ەۋروپالىق نورمانى ەنگٸزٸپ ٷلگەرمەسە, گاز تاسىمالداۋ بويىنشا قىسقا مەرزٸمدٸ كەلٸسٸم-شارتقا قول قويۋدى ۇسىنعان.
ال ورجەل ەكٸ تاراپتىڭ جىل سوڭىنا دەيٸن كەلٸسٸم-شارت جاساسىپ ٷلگەرمەۋٸ مٷمكٸن ەكەنٸن ايتىپ, الايدا ۋكراينا جاعى قۇجاتقا قول قويىلادى دەپ ٷمٸتتەنەتٸنٸن جەتكٸزگەن. رەسەي جاعى ۋكراينا ارقىلى ەۋروپاعا 2020 جىلى گاز تاسىمالداۋدى جالعاستىرا بەرەتٸنٸنە سەنٸمدٸ ەكەنٸن اتاپ ٶتكەن.
ۋكراينا بٸرنەشە جىل بۇرىن رەسەيدەن تٸكەلەي گاز ساتىپ الۋدان باس تارتقان. الايدا ونىڭ اۋماعىنان ورتالىق جەنە وڭتٷستٸك ەۋروپاعا قاراي ماگيسترالدى گاز قۇبىرى ٶتەدٸ. ترانزيتتٸ توقتاتۋ بۇل ەلدەردٸڭ گازسىز قالۋ قاۋپٸن ۇلعايتا تٷسەدٸ. بۇعان دەيٸن گەرمانييا بيلٸگٸ 2019 جىلدان كەيٸن دە گاز تاسىمالداۋ جالعاسۋى تيٸس دەپ بٸرنەشە رەت ەسكەرتكەن.
