Tanymal qazaqstandyq Telegram-arnada COVID-19-ǵa qarsy vaktsinalarda, maskalarda jáne PTR-testterde miǵa enip, tromboz jáne basqa da birqatar aýrýlar týdyrýǵa qabiletti grafen oksidi bar ekendigi týraly habarlama taratylýda. Bul - jalǵan. Bul týraly stopfake.kz saity habarlady.
Grafen – qalyńdyǵy bir atom bolatyn kómirtek atomdarynyń qabatynan turatyn material. «Grafen oksidi «termini grafenniń ottegi bar fýnktsionaldy toptarmen jáne (nemese) molekýlalarmen bailanysyn bildiredi. Qurylymynda bir nemese birneshe bor, azot, aliýminii, fosfor, kremnii, kúkirt nemese olarǵa negizdelgen top atomdary bar grafen oksidteri belgili. Mysaly, melamin, fosfin, silan, polisiloksan, sýlfidter jáne t. b. túrleri – polietilenglikol, poliefir, polivinil, poliakril jáne t. b. siiaqty polimerlermen ózgertilgen grafen oksidteri.
Grafen men onyń oksidterin qoldaný aiasy óte keń jáne áli de zertteý satysynda. Atap aitqanda, grafen oksidi qaterli isikterdi emdeýge arnalǵan dári-dármek óndirisinde, ǵylymi tájiribelerde, DNQ rettiligi kezinde, ónerkásipte jáne basqa salalarda
qoldanylady.
Meditsinalyq maskalar óndirisinde grafendi qoldaný zertteldi. Bul zertteýler oń nátije kórsetti.
Keibir kompaniialar grafenmen qaptalǵan jeke qorǵanys quraldaryn shyǵara bastady. Alaida, mundai jańalyq keibir azamattar arasynda alańdaýshylyq týdyrdy. Atap aitqanda, Kanadada mundai maskalar partiiasyna shaǵymdar tústi: olardy kigen adamdar bas aýrýy, tamaqtyń jybyrlaýy jáne álsizdik sezingenderin aitqan. Osydan keiin partiia qaitaryldy. Bul týraly biz
jazǵan bolatynbyz. Keiinnen Kanada biligi grafenmen qaptalǵan jeke qorǵanys quraldaryn zerttep, olardyń ýyttylyǵyna
dálelder tappady.
Aita keteiik, zamanaýi materialdan jasalǵan jabyn barlyq meditsinalyq maskalarda bolmaidy. Olardyń kóbi spanbondtan jasalady jáne quramynda grafen nemese onyń oksidteri joq. Qazaqstanda grafen jabyny bar maskalar joq.
Grafen oksidi PTR testileý ádisin jaqsartý quraly retinde de qarastyrylady. Alaida, bul jaǵdaida zat biomaterial alý kezinde emes, taldaý kezinde tikelei qoldanylady. Tiisinshe, adam denesiniń shyryshty qabattarynan jaǵyndy alatyn stikterde grafen oksidi
joq. Osylaisha, PTR-taldaý alý kezinde grafen oksidi patsienttiń denesimen eshqandai bailanysta bolmaidy jáne qandai da bir ziian keltire
almaidy.
COVID-19 qarsy vaktsinalar quramyndaǵy grafen oksidine keletin bolsaq, bul qastandyq teoriiasy. Vaktsinalarda grafenniń de, onyń oksidteriniń de nege bolmaityny týraly tolyǵyraq myna jerden oqi alasyz:
Grafen jáne onyń oksidteri denege teris áser etýi múmkin. Degenmen, dári-dármekte qoldanylatyn oksidterdiń túrleri barlyq yqtimal teris áserlerdi beitaraptandyrý úshin
modifikatsiialanady.
Grafen oksidi tromboz týdyrmaidy. Kerisinshe, bul zat osy aýrýdy emdeýge arnalǵan preparattardy ázirleý úshin
qoldanylady.
Grafen oksidiniń paidalanýshylar jazǵandai midy qorǵaityn gematoentsefalitikalyq toqsqaýyldan ótý múmkindigi is júzinde zerttelmegen. Ǵalymdarda bul zat mimen árekettesip, neirologiialyq aýrýlardy týdyrýy múmkin dep aitýǵa jetkilikti negiz
joq.
Demek, maskalarda, PTR-testterde jáne vaktsinalar quramyndaǵy grafen oksidiniń bolatyny týraly habarlamalar asyra silteý, manipýliatsiia jáne konspirologiia. Bul zatty qoldaný aiasy óte keń bolǵanyna qaramastan, ol meditsinalyq maskalar óndirisiniń kóbinde qoldanylmaidy. Qazaqstanda mundai jeke qorǵaný quraldary múldem joq. PTR testileý kezinde grafen oksidi qoldanylýy múmkin, biraq biomaterialdy alý kezinde emes, taldaý satysynda ǵana. Tiisinshe, zat adam denesimen ózara árekettespeidi. COVID-19 qarsy vaktsinalar quramynda bul zat joq.
Grafen oksidiniń toksikologiialyq qasietteri áli de zerttelýde, biraq ǵalymdar ony dári-dármek jasaý kezinde qoldaný úshin komponenttiń teris áserin beitaraptandyrýdyń jolyn tapty.
