Foto: ©️ Tengrinews.kz / Turar Qazanǵapov
Ulttyq qaýipsizdik komitetiniń burynǵy basshysy Kárim Másimov aqshany jylystatty jáne para aldy degen kúdikke ilindi.
Bul týraly QR Ulttyq qaýipsizdik komitetiniń "QazAqparat" agenttigine bergen jaýabynda kórsetilgen.
"Kárim Másimovke qatysty QR QK 218-baby «Qylmystyq jolmen alynǵan aqshany jáne (nemese) ózge múlikti zańdastyrý (jylystatý)» jáne 366-baby «Asa iri kólemde para alý» boiynsha sotqa deiingi tergeý júrip jatyr", - delingen QR UQK jaýabynda.
Sol sebepti Qylmystyq atqarý kodeksiniń 92-baby 3-bóligine sáikes Kárim Másimov prokýratýra sanktsiiasymen qylmystyq is aiasynda tergeý amaldaryn júrgizý maqsatynda Astana qalasy UQK tergeý izoliatorynda qaldy.
Eske salaiyq, buǵan deiin K.Másimov pen A.Sadyqulovqa memleketke opasyzdyq jasaý, bilikti kúshpen basyp alý, bilik pen laýazymdyq ókilettigin asyra paidalaný, D.Erǵojinge bilikti kúshpen basyp alý, bilik pen laýazymdyq ókilettigin asyra paidalaný, M.Osipovke bilik pen laýazymdyq ókilettigin asyra paidalaný aiyby taǵylǵan.
2023 jyldyń 10 naýryzynda UQK baspasóz qyzmeti Másimov Premer-Ministr bolǵan kezde Astanadan, biznes-qurylymdardyń birinen quny 2,5 mlrd teńge bolatyn sáýletti qonaqúi men jer telimin alǵanyna qatysty tergeý júrip jatqanyn habarlady.
2023 jyldyń 24 sáýirinde Astana qalasynyń qylmystyq ister jónindegi mamandandyrylǵan aýdanaralyq soty Ulttyq qaýipsizdik komitetiniń burynǵy tóraǵasy Kárim Másimovke jáne onyń orynbasarlary A.Sadyqulovqa, D.Erǵojinge, M.Osipovke qatysty qylmystyq is boiynsha úkimin jariia etti.
K.Másimov - 18, A.Sadyqulov - 16 jylǵa, D.Erǵojin taǵylǵan aiyptarǵa sáikes - 15 jylǵa, M.Osipov bolsa bilik pen laýazymdyq ókilettigin asyra paidalaný babymen 3 jylǵa bas bostandyǵynan aiyryldy. Sottalýshylardyń barlyǵy ómir boiy memlekettik qyzmette laýazym ielene almaidy. Sonymen qatar barlyǵy general shenderinen jáne memlekettik nagradalarynan aiyryldy.
Budan bólek, sottalýshylardan memleket kirisine 10 mlrd teńgeden astam qarjy jáne 24 mln AQSh dollary óndirip alyndy.
