"QR Premer-ministri Kárim Másimov Resei premeri Dmitrii Medvedevpen kezdesip, Kenesary han men Keiki batyrdyń bas súiektirin qaitarý máselesin kóteretinin málim etti", - dep jazady Ult.kz tilshisi BAQ.kz-ke silteme jasap.
Bul týraly Premer-Ministr óziniń twitter-degi jeke paraqshasynda jazdy.
«D.A.Medvedevpen kezdesýde Kenesary han men Keiki batyrdyń bastaryn qaitarý máselesin kóterýdi josparlap otyrmyn», - dep jazdy Kárim Másimov.
Aita keterligi, buǵan deiin Kenesary han men Keiki batyrdyń basyn elge ákelý máselesi qoǵamda qyzý talqylaýdaǵy máseleler edi. Eger Kárim Másimov bul isti qolǵa alyp, nátije shyǵaratyndai bolsa, qazaq halqynyń ǵana emes, Qazaqstan tarihynyń rýhy bir kóterilip qalar edi.
Esterińizde bolsa, qazaqtyń sońǵy hany Kenesarynyń basyn qyrǵyz manaptary Aq patshaǵa tartý etkeni tarihtan belgili. 1847 jyly Kenesary han Qyrǵyzstannyń Jetijal jotasynyń ońtústik alabyndaǵy Kekilik-Seńgir ańǵarynda osylaisha aiýandyqpen óltiriledi. Jaýlary onyń basyn kesip alyp, orys ákimshiligine jiberdi. Kniaz Gorchakov Kenesarynyń basyn Batys Sibir bas basqarmasyndaǵy «Kenesary búligi týraly» iske qosyp saqtaýǵa buiryq berdi.
Al ult azattyq qozǵalysynyń jetekshileriniń biri, Keiki (Nurmaǵanbet) Kókembaiuly (1871-1923) - 1916 jylǵy Torǵaida bolǵan ult-azattyq kóterilisiniń batyry, ataqty mergen. Orta júz quramyndaǵy Qypshaq taipasynyń Qulanqypshaq rýynan shyqqan. Qostanai oblysy Amankeldi aýdanynyń Baitýma qopasynda dúniege kelgen.
Biraz jyl Ulytaý, Qyzylqum jaǵynda boi tasalaidy. Aqyry, 1923 jyldyń kókteminde arnaiy tapsyrmamen ózin aldap qolǵa túsirýge kelgen komissar A.Tokarevtiń sózine senip Torǵaiǵa oralǵan Keiki jolda onyń shyn nietin sezip qalyp, Aleksandr Tokarevti sol jerde atyp tastaidy. Biraq Keikiniń izine túsip, artynan alystan ańdyp erip kele jatqan qyzyl áskerdiń soldattary, ony sol kúni túnde jatqan jerinde qorshap alyp, aiýandyqpen óltiredi. Olar mergenniń eki qoly men basyn kesip alady. Keiki batyrdyń basyn bir ai boiy Torǵai qalasynyń ortalyq alańyna syryqqa shanshyp qoiady. Keiin mergenniń bas súiegin Orynborǵa jóneltedi, al 1926 jyly respýblika astanasy Qyzylordaǵa kóshýine bailanysty, Sankt-Peterborǵa alyp ketken. Ol qazir Sankt-Peterbordaǵy antropologiialyq qordyń kýnstkamerasynda saqtaýly.
