Qasym-Jomart Toqaev Qaraǵandy oblysyna jumys sapary aiasynda Jezqazǵan óńiriniń áleýmettik damýy men mineraldy-shikizat bazasyn keńeitý jónindegi «Qazaqmys korporatsiiasy» jaýapkershiligi shekteýli seriktestiginiń josparymen tanysty, dep habarlaidy "Ult aqparat" Aqordanyń baspasóz qyzmetine silteme jasap.
«Qazaqmys» kompaniialar tobynyń prezidenti Vladimir Kim Memleket basshysyna Jezqazǵan ken oryndaryndaǵy qazba jumystarynyń áser etý aimaǵynan 2 815 otbasyn kóshirý jáne infraqurylym júrgizý jumystarynyń aiaqtalǵany týraly baiandady.
«Qazaqmys Holding» direktorlar keńesiniń tóraǵasy Edýard Ogai Prezidentke Qazaqstan Respýblikasyn 2025 jylǵa deiin damytýdyń ulttyq jospary negizinde Qaraǵandy oblysynyń ákimdigimen birlese otyryp, Jezqazǵan men Balqash óńirlerin damytýdyń 2020-2025 jyldarǵa arnalǵan baǵdarlamasynyń ázirlengeni jóninde aitty. Baǵdarlamada negizgi úsh baǵyt qamtylǵan. Atap aitqanda, áleýmettik qyzmetterdiń deńgeiin arttyrý, infraqurylymdy jetildirý jáne ekonomikalyq damý.
Qasym-Jomart Toqaevqa sýmen qamtamasyz etý jobalaryn iske asyrýdyń perspektivalary, bilim sapasyn arttyrý, azyq-túlik naryǵyndaǵy baǵalardy turaqtandyrý jóninde aityldy. Sondai-aq, korporatsiianyń áleýmettik mindettemelerdi oryndaýy jáne investitsiialyq jobalardy iske asyrýy jóninde málimet berildi. Kompaniia aimaq turǵyndary arasynda áleýmettik saýalnama júrgizip, ómir súrýdiń qolaily jaǵdaiyn jasaýǵa nietti. Jezqazǵan men Balqash óńirlerin órkendetýde elimizdiń damyǵan aimaǵy sanalatyn Almaty qalasy úlgi bolmaq.
Jumys sapary barysynda Memleket basshysyna Jezqazǵan qalasyn sapaly aýyzsýmen qamtamasyz etýdiń qiyndyqtary týraly baiandaldy. Máseleni sheshý úshin Úitas-Aidos sýqubyryn qaita jóndeýden ótkizip, Qojamseiit ken ornynda jańa sýqubyryn salý qajet. Prezident Úkimetke jáne oblys ákimdigine atalǵan jobany 1,5 jyldyń ishinde júzege asyrýdy tapsyrdy.
– Zertteý baǵyttaryńyz durys dep esepteimin. Sýmen qamtý – sheshýdi qajet etetin mańyzdy áleýmettik másele. Men Joldaýymda osy týraly aitqanmyn. Úkimet tiisti tapsyrma aldy. Meniń oiymsha, Úkimet ákimdikpen jáne sizdermen birlesip, qysqa merzim ishinde, ary ketkende 1,5 jylda osy máseleni sheshýi kerek. Biz azamattarymyzdy taza aýyzsýmen qamtamasyz etýimiz qajet. Men bul máseleni óz baqylaýyma alamyn, – dedi Memleket basshysy.
Prezident «Qazaqmys» korporatsiiasynyń bilim salasyndaǵy jobalarǵa qoldaý kórsetip otyrǵanyn oń baǵalady.
– Shyn máninde, bilim – memleketimizdiń bolashaǵy. Bul jerde, eń aldymen, muǵalimder daiyndaýǵa kóńil bólinýi kerek, – dedi Qasym-Jomart Toqaev.
Memleket basshysy azyq-túlik baǵasynyń qymbattaýyna jáne aýyl sharýashylyǵyn sýbsidiialaý máselesine qatysty pikir bildirdi.
– Bul, árine, álem naryǵynda bolyp jatqan kúrdeli másele. Álemde barlyq taýardyń baǵasy shamamen 40-50 paiyzǵa qymbattady. Bizdiń elimizdegi qordalanǵan máselelerdiń saldarynan azyq-túlik qymbattap otyr. Bul máseleni shuǵyl sheshýge qansha tyryssaq ta, jaǵdaidy ózderińiz de kórip otyrsyzdar. Atalǵan máseleni júieli túrde sheshýimiz qajet. Aýyl sharýashylyǵy salasyna qyrýar qarjy bólsek te, azyq-túliktiń basym bóligin syrttan alamyz. Ózge elder sýbsidiianyń ne ekenin de bilmeidi. Bilse de, dál osyndai mol qarjy bólinbeidi. Bir jaǵynan adamdardy bosańsytyp jiberdik, ekinshi jaǵynan sybailas jemqorlyqqa jol berip aldyq. Bul máselemen túbegeili ainalysýymyz kerek. Men Úkimetke, Aýyl sharýashylyǵynyń jańa ministrine mindet júktedim, – dedi Prezident.
Is-shara barysynda ekologiiaǵa jáne iri kásiporyndardyń shyǵaratyn qaldyqtaryna qatysty máselege erekshe nazar aýdaryldy.
– Biz 2060 jyly karbonizatsiia deńgeiin nólge túsiremiz dep jariialadyq. Ekonomikamyzdyń ereksheligin jáne onyń qurylymyn eskerýimiz qajet. Energiialyq teńgerimniń 70 paiyzy kómirge tiesili ekeni belgili. Biz erteń bárin jaýyp tastap, kómirteginen aryldyq dep aita almaimyz. Bul sizderdiń kásiporyndaryńyzǵa da qatysty. Biraq 2060 jylǵa qarai kómirteginen arylý baǵyty boiynsha júrýge tiispiz. Áitpese, álemdik damýdyń kóshinen qalyp qoiamyz. Bul negizgi kásiporyndardyń múddesin eskere otyryp, Úkimetke jáne Memleket basshysy retinde maǵan da júktelgen asa jaýapty mindet, – dedi Qasym-Jomart Toqaev.
Prezident jiyndy qorytyndylai kele, barlyq bekitilgen baǵyttar boiynsha memleket otandyq jetekshi kásiporyndarmen birlesip, tiisti jumystardy belsendi jalǵastyrýy kerek ekenin aitty.
