Ádilet ministri Marat Beketaev kóshede de, internette de qaptap ketken býkmekerlik jarnamaǵa qatysty pikir bildirdi, dep habarlaidy "Ult aqparat".
Ádilet ministrliginiń alqa májilisinde Nur-Sultan qalasy ádilet departamentiniń basshysy Alan Tilenshiev býkmekerlik jarnamalardyń artýyna bailanysty alańdaýshylyq bildirdi.
«Býkmekerlik agenttikter men stavkalar týraly aitsam dep edim. Ókinishke qarai, qarapaiym azamat retinde baiqasaq, qazir ainalanyń bárinde býkmekerlik agenttikterdiń jarnamasy qaptap kettti. Bálkim, jaýapty ministrlikpen birge jarnama týraly qoldanystaǵy zańnamaǵa ózgeris engizý máselesin kótergen durys bolar?! Óitkeni bizdiń balalar internette de, kóshede de kún saiyn býkmekerlerdiń jarnamasyn kóredi. Ókinishke qarai, jastardyń soǵan qyzyǵýshylyǵy jyl sanap artyp barady», - dedi Alan Tilenshiev.
Bul usynysqa ministr qoldaý bildirdi.
«Bul usynysty qoldaimyn. Usynystardy ázirlep, Bilim jáne ǵylym ministrligi men Aqparat jáne qoǵamdyq damý ministrligine hat joldaiyq. Osy máselemen ainalysaiyq», - dedi Marat Beketaev.
