QR Energetika ministri Qanat Bozymbaevtyń xalyqqa esep berý kezdesýinde Taldyqorǵan qalasynyń turǵyny beinekonferentsiia arqyly "Almatyda Atom elektr stansasy salynady" degen qaýesettiń qanshalyqty ras ekenin surady.
Buǵan deiin keibir aqparat kózderinde "Balqash kóli mańyndaǵy Úlken kenti atom elektr stantsiiasyn salýǵa yńǵaily jer retinde qarastyrylyp otyr" degen aqparat taraǵan bolatyn. Taldyqorǵan qalasynyń turǵyny osyǵan óziniń alańdaýshylyǵyn bildirdi.
"Elimizde eshqandai elektrge tapshylyq joq. Ondai qajettilik 2025-2027 jyly bolady degen boljam bar ekeni ras. Sol kezde ońtústikpen ortalyqta profitsit bolýy múmkin. Bul aimaqqa Balqash kóli mańyndaǵy Úlken kentte kiredi. Alaida, bul ol jerde AES salynady degendi bildirmeidi", - dedi Qanat Bozymbaev.
Ol elimizde AES salynady degen qaýesetti sheteldik uiymdar taratyp jatsa, bul olardyń nieti dep qabyldaý kerektigin aitty.
"Másele tolyq zerttelmei, eshqandai sheshim qabyldanbaidy. Sol sebepti odan qorqýdyń qajeti joq. Onyń bári qaýeset ǵana. Eger mundai aqparattardy sheteldik uiymdar men kompaniialar taratyp jatsa, solardyń nieti ǵana dep qabyldaý kerek ekenin eskertemin. Álde saiasi oiyn ǵana bolýy múmkin. Prezident Qasym-Jomart Toqaev Semeige barǵan saparynda AES jaily óz ustanymyn aitty. Prezident mundai máselede halyqtyń talap tilegi eskerile otyryp sheshim qabyldanatynyn aitty. Iaǵni saýalnama júrgizý nemese referendým arqyly. Jappai xalyq qarsy bolyp jatsa, eshteńe salynbaidy. Oǵan alańdaýǵa sebep joq", - dedi ministr.
