Qaraǵandy turǵyny elordada saparmen júrip, bireýdiń eksvatoryn minip ketken, dep habarlaidy "Ult aqparat".
«Búgin tańǵy saǵat 5 kezinde 102 kanalyna temirjol vokzaly mańynda ekskavator iske qosylyp turǵany jaiynda jáne onyń kabinasynda júrgizýshisi uiyqtap otyrǵany týraly habar kelip tústi. Oqiǵa ornyna jedel túrde politseiler jetip, júrgizýshini ustady. 30 jastaǵy er adam politsiianyń aýmaqtyq basqarmasyna jetkizildi. Belgili bolǵandai, ol alkogolge masaiǵan kúiinde bireýdiń tehnikasyn minip ketken», - delingen qalalyq Politsiia departamenti málimetinde.
Tekserý barysynda atalǵan adam Qaraǵandy turǵyny ekeni jáne ekskavatorshy bolyp jumys isteitindigi anyqtaldy. Ol elordada dosynyń úiine qonaqqa kelgen. Keiinnen alkogoldik ishimdikke masaiǵan kúiinde kóshede turǵan bireýdiń ekskavatoryn otaldyryp, minip júre bergen. Er adam budan keiin ne istegenin bilmeidi, tek politseiler kelgen kezde ǵana esin jiǵan.
«Ekskavator iesi óziniń tehnikasyn qurylys nysanyna jaqyn jerge qoiǵan eken. Tehnikanyń joǵalǵany jaiynda politsiia qyzmetkerlerinen bilgen», - dep atalyp ótken habarlamada.
Atalǵan fakti boiynsha qylmystyq is qozǵaldy.
