Foto: © AFP 2023 / FADEL SENNA
Marokkoda jer silkinisinen qaza tapqandar sany 632-ge jetti, dep habarlady Sputnik Qazaqstan saity Al-Arabiya telearnasyna silteme jasap.
"Jer silkinisinen qaza tapqandar sany 632-ge jetti, taǵy 329 adam jaraqat aldy", - delingen Ishki ister ministrliginiń habarlamasynda.
Esterińizge sala keteiik, Marokkoda 8 qyrkúiek keshke magnitýdasy 6,9 bolatyn joiqyn jer silkinisi boldy.
Eýropa-Jerorta teńizi seismologiialyq ortalyǵynyń (EMSC) málimetinshe, jer silkinisiniń oshaǵy Marrakeshten ońtústik-batysqa qarai 77 shaqyrym jerde ornalasqan. Mamandardyń aitýynsha, zilzala oshaǵy 10 shaqyrym tereńdikte bolǵan. Magnitýdasy 4,8-ge deiin jetetin jerasty dúmpýleri birneshe ret qaitalanǵan.
Marokko aqparat agenttigi (MAP) Ishki ister ministrliginiń málimetine silteme jasap, 296 adam qaza taýyp, 153 adam jaralanǵanyn habarlady.
Seismologtar aldaǵy birneshe saǵatta, tipti aldaǵy birneshe kún ishinde jer silkinisinen keiingi dúmpýler bolýy múmkin ekenin eskertti.
