Foto: kollaj inbusiness.kz
Marqum órt sóndirýshi, erjúrek batyr Asqar Zabikýlinniń qyzy mektep tabaldyryǵyn attap, 1-synypqa bardy, dep habarlaidy TJD baspasóz qyzmeti.
Alǵashqy qońyraý kúni ony ákesiniń áriptesteri jalǵyz qaldyrmai, mektepke birge ertip aparyp, qýanyshyna ortaqtasty.
Osylaisha, elordalyq TJD qyzmetkerleri qyzmet barysynda erlikpen qaza tapqan áriptesteriniń otbasyna qoldaý kórsetip, qyzyn alǵashqy qadamymen quttyqtady.
Saltanatty jiynnan soń batyrdyń otbasy Asqar Zabikýlinniń esimi berilgen órt sóndirý bólimine baryp, eskertkishine taǵzym etip, eske alý buryshymen tanysty.
"Batyrdyń urpaǵyna kórsetilgen qamqorlyq – bul erlik pen adaldyqtyń jarqyn úlgisin kórsetken Asqar Zabikýlinniń rýhyna kórsetilgen qurmet", – delingen TJD habarlamasynda.
Eske sala keteiik, 2022 jyldyń 16 qarashasynda Astanadaǵy órt kezinde Asqar Zabikýlin adamdardy qutqaryp, ózi aýyr jaraqat aldy. Ol 20 qarasha kúni aýrýhanada kóz jumdy. Prezident Jarlyǵymen Asqar Zabikýlin I dárejeli "Aibyn" ordenimen marapattaldy.
