Baqytjan Saǵyntaev Úkimetiniń nazaryna!
ShENEÝNIKTER TÁRTIPKE BAǴYNSYN!
Jumys babymen Astanadaǵy memlekettik organdarda, ministrlikterde, ákimshilikterde jii bolýǵa týra keledi. Keide jumys aiaǵyna deiin, odan da uzaq qalatyn kezimiz bar. Meni tań qaldyratyny sondaǵy sheneýnikterdiń jumysta keshki 20.00 – 21.00-ge deiin, tipti odan da uzaq jumysta otyratyndyǵy. «Bul qalai?» deseń, «Bastyq otyrsa biz de otyramyz, ruqsatsyz ketýge bolmaidy» deidi. Úige qaitý úshin bastyǵynyń, bastyǵy bastyǵynyń, ol ministrdiń orynbasarynyń ruqsatyn kútip otyrǵany. Oblys ákimshilikteri terezesiniń jaryqtary da keshke ońaishylyqpen óshpeidi.
«Artyq istegen ýaqyt úshin aqsha qosa ma?». "Qaidan?! Bastyqtar bizge "Do shesti chasov ty rabotal dlia sebia, a posle shesti ty doljen rabotat dlia Pravitelstva" dep úiretedi» deidi atyn jariia etýdi qalamaityn qyzmetkerler. Keshki altydan keiin baiǵustardyń jipsiz bailanyp otyrǵany. Úilengenderi balasyn balabaqshadan alýdy bir birine tapsyryp jatqany. Qaptaǵan turmysqa shyqpaǵan qyzdar, úilenbegen jigitter. «Ói, ainalaiyndar, ómir ótip barady, úilenbeisińder me?» deimiz. «Oi, aǵai, jumystan túngi toǵyz, onda shyǵamyz. Tanysýǵa, qydyrýǵa ýaqyt qaida? Tańerteń 08.50-de jumysta bolý kerek. Elektrondyq kártishkemen kirgizedi. Keshikseń jaza tartasyń, jalaqyń azaiyp qalýy kádik. Sondyqtan jeke ómirimizge ýaqyt qalmaidy!» dep aǵynan jarylady keibir ini-qaryndastarymyz.
Is júzinde olar 11-12 saǵat jumys isteidi. Artyq istegen saǵattaryn ótep jatqan eshkim joq. Tipti senbi, jeksenbi kúnderi amalsyz jumysqa shyǵatyndary bar.
Sonda «Eńbek kodesi» kim úshin jazylǵan? Eger Úkimet oryndamasa, ministrlikter, ákimshilikter oryndamasa ol Kodestiń kimge keregi bar? Segiz saǵat jumys mindetti. Qyzmetkerlerdi qanaýǵa nege jol beriledi? Jipsiz bailanǵan jerde jóndi nátije bola ma? Eger sheneýnikterdiń tań atqannan tún jarymǵa deiin istegeninen ekonomika gúldenip keter bolsa onda Qazaqstan otyzdyq túgili alǵashqy ondyqqa kirmes pe edi? Alaida statderekter ekonomikanyń keri ketip bara jatqanyn aidan anyq kórsetip tur ǵoi. Eger Úkimet óz jumysyn tiimdi uiymdastyra alsa sharýany altyǵa deiin de tyndyrýǵa bolady.
Sondyqtan keshki saǵat altydan keiin qyzmetkerler eshkimniń ruqsatynsyz úilerine qaita berýi kerek. Sheneýnikter halyqtan zańǵa baǵynýdy talap eterden buryn tártipke ózderi baǵynýy kerek dep oilaimyn!
Marat Toqashbaevtyń feisbýktegi jazbasynan
