مارات توقاشباەۆ. شەنەۋنٸكتەر تەرتٸپكە باعىنسىن!

«ارتىق ٸستەگەن ۋاقىت ٷشٸن اقشا قوسا ما?». "قايدان?! باستىقتار بٸزگە "دو شەستي چاسوۆ تى رابوتال دليا سەبيا, ا پوسلە شەستي تى دولجەن رابوتات دليا پراۆيتەلستۆا" دەپ ٷيرەتەدٸ» دەيدٸ اتىن جارييا ەتۋدٸ قالامايتىن قىزمەتكەرلەر. كەشكٸ التىدان كەيٸن بايعۇستاردىڭ جٸپسٸز بايلانىپ وتىرعانى. ٷيلەنگەندەرٸ بالاسىن بالاباقشادان الۋدى بٸر بٸرٸنە تاپسىرىپ جاتقانى. قاپتاعان تۇرمىسقا شىقپاعان قىزدار, ٷيلەنبەگەن جٸگٸتتەر. «ٶي, اينالايىندار, ٶمٸر ٶتٸپ بارادى, ٷيلەنبەيسٸڭدەر مە?» دەيمٸز. «وي, اعاي, جۇمىستان تٷنگٸ توعىز, وندا شىعامىز. تانىسۋعا, قىدىرۋعا ۋاقىت قايدا? تاڭەرتەڭ 08.50-دە جۇمىستا بولۋ كەرەك. ەلەكتروندىق كەرتٸشكەمەن كٸرگٸزەدٸ. كەشٸكسەڭ جازا تارتاسىڭ, جالاقىڭ ازايىپ قالۋى كەدٸك. سوندىقتان جەكە ٶمٸرٸمٸزگە ۋاقىت قالمايدى!» دەپ اعىنان جارىلادى كەيبٸر ٸنٸ-قارىنداستارىمىز.

ٸس جٷزٸندە ولار 11-12 ساعات جۇمىس ٸستەيدٸ. ارتىق ٸستەگەن ساعاتتارىن ٶتەپ جاتقان ەشكٸم جوق. تٸپتٸ سەنبٸ, جەكسەنبٸ كٷندەرٸ امالسىز جۇمىسقا شىعاتىندارى بار.

سوندا «ەڭبەك كودەسٸ» كٸم ٷشٸن جازىلعان? ەگەر ٷكٸمەت ورىنداماسا, مينيسترلٸكتەر, ەكٸمشٸلٸكتەر ورىنداماسا ول كودەستٸڭ كٸمگە كەرەگٸ بار? سەگٸز ساعات جۇمىس مٸندەتتٸ. قىزمەتكەرلەردٸ قاناۋعا نەگە جول بەرٸلەدٸ? جٸپسٸز بايلانعان جەردە جٶندٸ نەتيجە بولا ما? ەگەر شەنەۋنٸكتەردٸڭ تاڭ اتقاننان تٷن جارىمعا دەيٸن ٸستەگەنٸنەن ەكونوميكا گٷلدەنٸپ كەتەر بولسا وندا قازاقستان وتىزدىق تٷگٸلٸ العاشقى وندىققا كٸرمەس پە ەدٸ? الايدا ستاتدەرەكتەر ەكونوميكانىڭ كەرٸ كەتٸپ بارا جاتقانىن ايدان انىق كٶرسەتٸپ تۇر عوي. ەگەر ٷكٸمەت ٶز جۇمىسىن تيٸمدٸ ۇيىمداستىرا السا شارۋانى التىعا دەيٸن دە تىندىرۋعا بولادى.

سوندىقتان كەشكٸ ساعات التىدان كەيٸن قىزمەتكەرلەر ەشكٸمنٸڭ رۇقساتىنسىز ٷيلەرٸنە قايتا بەرۋٸ كەرەك. شەنەۋنٸكتەر حالىقتان زاڭعا باعىنۋدى تالاپ ەتەردەن بۇرىن تەرتٸپكە ٶزدەرٸ باعىنۋى كەرەك دەپ ويلايمىن!