2019 jyldyń qorytyndysy boiynsha salyq bereshegi 12 paiyzǵa qysqardy. Bul týraly búgin Ortalyq kommýnikatsiialar qyzmetindegi baspasóz máslihatynda QR QM Memlekettik kirister komitetiniń tóraǵasy Marat Sultanǵaziev aitty, dep habarlaidy "Ult aqparat".
«Negizgi kórsetkishterdiń biri - bereshekter men artyq tólemderdiń qysqarýy. Ákimshilendirýdi jaqsartý boiynsha qabyldanǵan sharalar sońǵy 4 jylda artyq tólemderdiń eń úlken kólemine - 2,3 trln teńgeden 2,1 trln teńgege deiin tómendetýge múmkindik berdi. 2019 jyldyń qorytyndysynda ol 157 mlrd teńgege nemese 2,1 trln teńgege deiin qysqardy. Qabyldanǵan sharalardyń esebinen salyq bereshegin 12 paiyzǵa nemese 28,3 mlrd teńgege tómendetý qamtamasyz etildi. Ol 2020 jyldyń 1 qańtarynda 204 mlrd teńgeni qurady», - dedi ol.
Komitet basshysynyń aitýynsha, qazirgi ýaqytta memlekettik satyp alýdyń ashyqtyǵyn arttyrý maqsatynda oǵan qatysýshylardan qarjylyq turaqtylyǵyn rastaý talap etiledi. Bul da 58 salyq tóleýshiniń biýdjetke 1 mlrd teńgeden astam tólem jasaýyn qamtamasyz etip otyr.
«Buǵan qosa, ótken jyly iske qosylǵan táýekeli bar kompaniialardy anyqtaý jáne olarǵa erte satyda elektrondy shot-faktýralar jazyp berýdi shekteý boiynsha ilki joba júzege asyrylyp jatyr. Joba bastalǵannan beri 30 mlrd teńgeniń qosylǵan qun salyǵyn zańsyz esepke jatqyzýdyń joly kesildi. Munyń barlyǵy da salyq mádenieti men tártibiniń artýyna yqpal etti. Salyqtyq monitoring nátijesinde 36 paiyzǵa nemese 323 mlrd teńgege ósim qamtamasyz etildi», - dedi Marat Sultanǵaziev.
