Prezident Qasym-Jomart Toqaevtyń el basqarýy Qazaqstandaǵy saiasi klastyń kemel de ózgeristerge beiim ekenin kórsetti. Mundai pikirdi belgili saiasattanýshy Marat Shibutov bildirdi, dep habarlaidy QazAqparat.
«Men jalpy bizdiń aimaqqa, Qazaqstan men onyń bolashaǵyna qatysty aitylatyn ártúrli boljamdarǵa taldaý jasap otyramyn. Bul rette Qazaqstandaǵy bilik tranzit máselesi árdaiym kóptiń talqysyndaǵy áńgimeniń biri edi. Prezident Qasym-Jomart Toqaevtyń memleket basshylyǵyndaǵy 100 kúndigi – Qazaqstannyń saiasi júiesi qalyptasyp qana qoimai, bekem jumys istep turǵanyn, bilikti eshqandai problemasyz aýysa alatynyn da dáleldep berdi. Ártúrli jaisyz da jaily boljamdardyń bolǵany belgili. Olardyń bárin shynyna kelgende toqsanynshy jyldardan beri oqyp otyrmyz. Olardyń kóbin joqqa shyǵarǵanymyzdy da aita ketý kerek», - dedi saiasattanýshy elordadaǵy OKQ alańynda ótken «Qasym-Jomart Kemeluly Toqaev Prezidenttigi: alǵashqy 100 kún – maqsattar, qadamdar, taktikasy» atty dóńgelek ústel barysynda.
Marat Shibutovtyń aitýyna qaraǵanda, Qasym-Jomart Toqaevtyń el basqarýy bizdiń saiasi klastyń kemel de ózgeristerge beiim ekenin kórsetken.
«Prezident qoǵamnyń suranystaryn anyq ári aiqyn qabyldap, sol boiynsha jumys júrgizip jatqanyn baiqap otyrmyz. Kópbalaly analardyń jaǵdaiyna kelgende baiqasańyz, tek nesielik amnistiia ǵana qabyldanyp qoimai, biryńǵai áleýmettik karta daiarlandy. Iaǵni, naqty qadamdar qoǵamnyń suranystaryn qanaǵattandyryp keledi», - dedi Marat Shibutov.
Aita ketsek, Qasym-Jomart Toqaevtyń Memleket basshysy retinde halyq aldynda ant berip, ulyqtaý rásimine qatysqaly beri búgin 100 kún tolyp otyr. 100 kún ishinde atqarǵan jumystarynyń videosholýyn myna siltemeden kórýge bolady.
