QHA tóraǵasynyń orynbasary - Hatshylyq meńgerýshisi Marat Ázilhanov Prezident Joldaýyndaǵy tildik tutastyq týraly bastamalaryna Assambleia qalai úles qosatynyn aitty, dep habarlaidy QazAqparat.
«Táýelsizdik jyldarynda memlekettik til bizdiń memlekettigimizdiń arqaýyna, qazaqstandyq biregeiliktiń irgetasyna, jalpyǵa birdei tanylǵan azamattyq markerge ainaldy. Bilim berý salasyndaǵy júieli sharalar bul mindetti elimizdiń jas azamattarynyń árbir jańa býyny úshin qolaily sheshýge arnalǵan. Túrli etnostar ókilderi óz balalaryn qazaq balabaqshalaryna, qazaq mektepteri men JOO-da oqytýy búgingi tańda jii kezdesedi. Búginde Qazaqstanda 5644 uiym balalardy qazaq tilinde oqytady jáne tárbieleidi, 3798 qazaq mektebi jumys isteidi», - dedi Marat Ázilhanov QHA uiymdastyrýymen ótken dóńgelek ústelde.
Onyń aitýynsha, qazaq tilin úirený, onyń qyzmet etý aiasyn keńeitý, kúndelikti ómirde paidalaný qazaq tiline degen dostyq, senim men súiispenshilik jaǵdaiynda ótýi tiis.
«Barlyq basqa ádister, tájiribe kórsetkendei, biz kózdegen nátijege qol jetkizbeidi. Latyn grafikasyna kóshý, «Rýhani jańǵyrý» baǵdarlamasyn iske asyrý memlekettik tildi damytýǵa qýatty serpin berdi, Qazaqstan ádebietiniń tańdaýly shyǵarmalary BUU-nyń 6 tiline aýdaryldy, túrli bilim salalary boiynsha álemniń úzdik oqýlyqtary memlekettik tilge aýdaryldy. Búgingi tańda, Táýelsizdiktiń 30 jyldyǵynda, qazaq tili integrator-tilge, el ishindegi etnosaralyq qarym-qatynas tiline ainalatyn ýaqyt keldi. Bul pikirdi, árine, Qazaqstannyń barlyq azamattary, sonyń ishinde túrli etnostar ókilderi de qoldaidy», - dedi QHA tóraǵasynyń orynbasary.
