Foto:inbusiness.kz
"Mańǵystaýmunaigaz" AQ-na 32 mlrd. teńge aiyppul salyndy, dep habarlaidy Ult.kz Bas prokýratýraǵa silteme jasap.
Mańǵystaý oblysynyń prokýratýrasy “Mańǵystaýmunaigaz” AQ-nyń qyzmetinde aǵyndy sýlardy jer qoinaýyna jiberý, sondai-aq tiisti shekteý ornatpai burǵylaý qaldyqtaryn jinaqtaýmen bailanysty óreskel zań buzýshylyqtar anyqtady.
Prokýrorlarmen qoldanylǵan sharalardyń nátijesinde, sottyń 2024 jyldyń 4 jeltoqsandaǵy qaýlysymen kompaniia Ákimshilik quqyq buzýshylyq týraly kodekstiń 328-babymen ákimshilik jaýaptylyqqa tartylyp, 31 milliard teńge kóleminde aiyppul salyndy.
Sot aktisi zańdy kúshine endi.
Sondai-aq, munai jylytý peshterinen qorshaǵan ortaǵa lastaýshy zattardyń shamadan tys shyǵarylý faktisi de anyqtaldy. Bul derek boiynsha byltyr 11 jeltoqsanda kompaniia qosymsha ákimshilik jaýapqa tartylyp, 1,2 milliard teńge aiyppul salyndy.
Buǵan deiin Mańǵystaý oblysynyń tabiǵat qorǵaý prokýrorlary jer qoinaýyn paidalanýshy – «BýzachiNeft» JShS gazdy jaǵý saldarynan memleketke keltirilgen 2,2 milliard teńge kólemindegi ekonomikalyq zalaldy óteýine sharalar qabyldaǵanyn málimdegen.
Eske salaiyq, 09.06.2023j. «Qaraturyn Ońtústik» ken ornynda uńǵymany burǵylaý kezinde gaz-sý qospasynyń atqylap odan ári órtenýi oryn aldy. Bul apatty joiýǵa alty aiǵa jýyq ýaqyt ketti.
Tólem somasy Energetika ministrligi jáne jer qoinaýyn paidalanýshy aralyǵyndaǵy kelisilgen kúnderi bólip tóleý arqyly júzege asyrylady.
17.12.2024 j. memleket kirisine 270 mln teńge somasyna alǵashqy tólem tústi.
Budan basqa, buǵan deiin tabiǵat qorǵaý prokýratýrasynyń qadaǵalaý aktisi boiynsha oryn alǵan apatqa bailanysty ekologiialyq normalardy buzǵany úshin «BýzachiNeft» JShS-ne 362 mln teńge aiyppul salyndy, tolyq tólendi.
