2025 jylǵa deiin Mańǵystaý oblysynda gaz qubyrlaryn jóndeý men salýdy kózdeitin 7 joba iske asady, dep habarlaidy QazAqparat.
Bul týraly Energetika ministri Maǵzum Myrzaǵaliev Úkimet otyrysynda málim etti.
«Óńirdi gazdandyrý máselesine keletin bolsaq, oblysta jalpy quny 266,6 mlrd teńge bolatyn 7 gaz infraqurylymy jobasyn iske asyrý josparlanyp otyr», - degen ministr solardyń eń negizgilerine qysqasha toqtaldy.
Olar:
- jalpy somasy 207,4 mlrd teńgege «Beineý-Jańaózen» ýchaskesiniń 1-shi jelisin kúrdeli jóndeý jáne 2-shi jelisin salý jobasy;
- 16,5 mlrd teńge qajet etip otyrǵan «Jańaózen-Aqtaý» magistraldyq gaz qubyryn kúrdeli jóndeý jobasy;
- 25,7 mlrd teńge salý josparlanǵan Quryq aýylyna «Jańaózen-Aqtaý» magistraldyq gaz qubyrynan gaz burý jáne gaz taratý qubyrlaryn salý jobasy.
«Osy jobalardy iske asyrýdyń arqasynda Mańǵystaý oblysyn gazben jabdyqtaý máselesi tolyq sheshiledi. Jumys istep turǵan «Qazaq gaz óńdeý zaýytynyń» tozý deńgeii óte joǵary. Memleket basshysynyń tapsyrmasy boiynsha Jańaózen qalasynda zamanaýi gaz óńdeý zaýytyn salý josparlanǵan.
Bul zaýyt álemdik standarttarǵa sáikes jylyna 900 mln tekshe kóleminde shiki gazdy qaita óńdeitin bolady.
Osyǵan bailanysty, «QazMunaiGazǵa» bul jobany iske asyrý jumysyn jedeldetý qajettigin atap ótemin», - dedi Maǵzum Myrzaǵaliev.
