Mańǵystaý oblysynyń ákimdigi men «Olja Agro» JShS-gi arasynda mal azyǵyn tegin jetkizý boiynsha memorandýmǵa qol qoiyldy, dep habarlaidy óńir ákimdiginiń baspasóz qyzmeti.
Mańǵystaý oblysynda qýańshylyqtan qinalǵan sharýalarǵa kómek berý sharalary jalǵasýda. Oblys ákimdigimen kelisim aiasynda «Olja Agro» JShS Mańǵystaý oblysyna qurǵaqshylyqtan zardap shekken mal ielerine kómek retinde jalpy quny 32 million teńge bolatyn 250 tonna shóp jáne 180 tonna jem jetkizedi.
Sonymen qatar, qol qoiylǵan memorandým aiasynda «Olja Agro» JShS óńirge mal azyǵyn naryqtaǵydan tómen baǵamen jetkizetin bolady.
Oblys ákimi Nurlan Noǵaev turǵyndar arasynda jem-shópti jetkizý men bólýdiń ashyq tetigin uiymdastyrý jóninde birqatar naqty tapsyrmalar berdi.
Bul jumysqa jergilikti atqarýshy organnyń atynan oblys ákiminiń orynbasary Ǵalymjan Niiazov jaýapty bolyp, memorandýmǵa qol qoidy. «Olja Agro» JShS tarapynan kompaniianyń bas direktory Aidarbek Hodjanazarov qol qoidy.
