13-14 qyrkúiek aralyǵynda «Sisem - eldiń esigi, erdiń besigi» atty jalpyhalyqtyq rýhani is-sharasy ótip, as beriledi. Sonyń aiasynda qorymnyń mýltimedialyq kartasy jasalady, dep habarlaidy "Ult aqparat".
Bul týraly Óńirlik kommýnikatsiialar qyzmeti alańynda ótken brifingte belgili ólketanýshy Alqajan Edilhan aitty.
«Úsh júz alpys áýlieli Mańǵystaý atanǵan baǵzy jurt, babatopyraqta kúlli qazaq, isi musylman álemi úshin qundy sanalatyn qasietti oryndar az emes. Solardyń biri – Sisem ata qorymy. Bul qorymda tarihi tulǵalar, el qorǵaǵan batyrlar, biler men bekter, jomart-myrzalar, rýbasylar men rýhani kósemderdiń jany baiyz tapqan. Sisem ata týraly tarihi maǵlumat tym az. Onyń islam dinin taratqan qasiet iesi bolǵany ǵana aitylady. Sisem ata qorymy – keremet oiýlarymen, tańǵajaiyp epigrafikasymen, ártúrli sáýlettik pishindermen erekshelenedi», - deidi ólketanýshy.
Mańǵystaýlyqtar bul oryndy qazaq halqynyń birneshe qairatkeri jerlengeni úshin qurmet tutady. Sisem ata qorymy Mańǵystaý aýdanynyń Saiótes eldi mekeninen 35 shaqyrym qashyqtyqta ornalasqan. Ǵylymi tilde panteon (igi jaqsylar, jaisańdar, rýbasylar jerlengen oryn) dep ataidy.
Jergilikti kásipkerlerdiń qoldaýymen, el aǵalarynyń bastamasymen ótetin jalpyhalyqtyq sharada qazaq kúresi, alaman báige, jazba aqyndar músháirasy, ulttyq sport túrlerinen túrli saiystar joǵary deńgeide ótedi dep kútilýde.
«Qazirgi ýaqytta Sisem ataǵa arnaiy mýltimedialyq interaktivti karta jasaqtalyp jatyr, iaǵni uialy telefonmen QR kod arqyly Sisem ata týraly barlyq málimetti kórýge bolady», - deidi uiymdastyrýshylar.
Rýhani shara Ótes eldi mekeninen 2 shaqyrym jerde ótedi. Tańdap alynǵan arnaiy oryn kúre joldan 500 metrdei qashyqtyqta ornalasqan. Asqa 130-ǵa jýyq úi tigilip, 5 myń adam qatysady dep josparlanǵan.
Aita keteiik, Qazaqstannyń batysynda ornalasqan Sisem ata qorymy respýblikalyq deńgeide qorǵaýǵa alynǵan mańyzdy eskertkishter qatarynda.
