Májilis depýtattary Edil Jańbyrshin men Samat Mýsabaev aimaqtarǵa sapar barysynda Mańǵystaý oblysyna bardy, dep habarlaidy QazAqparat tómengi palatanyń baspasóz qyzmetine silteme jasap.
Depýtattar ekologiialyq keńes múshelerimen birge Munaily aýdanyndaǵy «Qoshqar ata» oipatynda radioaktivti qaldyqtar qoimasyn zalalsyzdandyrýǵa qatysty máselelerdi talqylady.
Munaily aýdany aýmaǵyndaǵy «Qoshqar Ata» kóli Kaspii teńizine 7-8 shaqyrym jerde ornalasqan. Al, Aqtaý qalasynan 3-4 shaqyrym qashyqtyqta jatyr. Bul kól qaldyqtar qoimasynyń jalpy aýdany 77 sharshy shaqyrym bolsa, qaldyqtardyń aýdany 66 sharshy shaqyrym shamasynda.
Turǵyndardyń aitýynsha, Mańǵystaý oblysynyń búgingi ekologiialyq ahýaly ábden ýshyqqan. Oǵan «Qoshqar ata» ýly kóli de áser etip otyr. Onsyz da qýańshylyqtan jii zardap shegip, sý tapshylyǵyn kóretin aimaq ýly kóldiń de zardabyn qosa tartýda. Qazir mańǵystaýlyqtar arasynda onkologiialyq, ókpe jáne júrek-qan tamyrlary aýrýlary, iod tapshylyǵy siiaqty dert túrleri kóp. Densaýlyǵy jaramsyz ana men odan týatyn dimkás bala sany da az emes.
Bul ekologiialyq aimaqta 400 myńǵa jýyq adam turady. Turǵyndardyń densaýlyǵy úshin tazartý jumystaryn júrgizý asa mańyzdy. Búgingi tańda ýly kóldiń 266 gektary zalalsyzdandyrylǵan. Ýaqytynda rekýltivikatsiialaý jumystaryn aiaqtap, sekseýil egý josparda bar,-deidi Májilis depýtaty Edil Jańbyrshin.
Depýtattar aimaqta jasalǵan jumystardyń sapasyna mán berip, aldaǵy atqarylar sharalar barysyn tyńdady. Merdiger mekeme basshysy istiń mán-jaiyn baiandady. Onyń aitýynsha, ótken jyly bólingen 1 mlrd qarjy igerilip, 266 gektar jer zalalsyzdandyryldy. Biyl bólingen 3 mlrd teńgege 800-900 gektar aimaqty rekýltivatsiialaý josparlanýda. Jumysty júrgizýge 40-qa jýyq tehnika, 70-ten astam adam tartylǵan.
Mańǵystaý oblysynan sailanǵan Májilis depýtattary óńirdegi máselege alańdaýly ekenin aityp, nazarlaryna alatyndaryn jetkizdi.
