Foto: Egemen.kz
Jańaózende 21 aqpanda Qazaqstannyń eń iri jáne tabiǵi kórikti jerleriniń biri – Bozjyra shatqalynda vizit-ortalyq salý máselesi boiynsha aldyn ala qoǵamdyq tyńdaýlar ótti, dep habarlaidy Ult.kz Orda.kz aqparattyq portalyna silteme jasap.
Joba avtorlarynyń aitýynsha, shatqaldyń joǵarǵy bóliginde qazaqy oiý-órnektermen bezendirilgen glempingter (tabiǵat aiasynda demalýǵa múmkindik beretin qonaq úi tárizdes kempingter jiyntyǵy - red), murajai, sholý alańdary men shaihana bolady.
Týristik oryndarǵa jol salynyp, elektr energiiasy tartylady. Ortalyq ǵimarattar jer bederine bailanysty 400-den 1000 metrge deiingi biiktikte ornalasady. Olar tereń irgetas salýdy qajet etpeitin jeńil qurastyrmaly qurylǵalar turǵyzatyn bolady.
«Sýmen qamtamasyz etý, elektr qýatymen qamtamasyz etý jáne qaldyqtardy qaita óńdeý máseleleri qorshaǵan ortaǵa ziian keltirmeitindei etip sheshildi. Sarqyndy sýlardy tazartý, qaldyqtardy suryptaý jáne kún energiiasymen qamtamasyz etý úshin biotazalaý júieleri qarastyrylǵan», - dep málimdeldi qoǵamdyq tyńdaýda.
Sonymen qatar joba sátti júzege assa, 70 jańa turaqty jumys orny ashylady.
«Jaqyn mańdaǵy eldi mekenderdiń turǵyndaryna aýyl sharýashylyǵy ónimderi men halyqtyń qoldanbaly óner buiymdaryn satýǵa múmkindik beriledi», - dep habarlady Mańǵystaý oblysynyń ákimdigi.
Jańa jobany Sharyn, Kólsai jáne Aiýsaidaǵy vizittik ortalyq salǵan, tájiribesi bar qazaqstandyq kompaniia jasaǵan.
Bozjyra alqabynda salynatyn týristik nysandardyń qurylysy birneshe jyldan beri aitylyp keledi. 2020 jyldyń kúzinde bul mańda qonaqúi salynady degen aqparat paida boldy. Keiin «qoǵamdaǵy teris pikirge» bailanysty prezident Qasym-Jomart Toqaev qurylys jobasyn qaita qaraýdy tapsyrdy.
2022 jyly Mańǵystaýdaǵy blogerler, belsendiler, týristik uiym ókilderi men ekologtar Bozjyra shatqalynyń bolashaǵyna alańdaýshylyq bildirdi. Sol kezdegi Mádeniet jáne sport ministri Dáýren Abaev «Bozjyra jabaiy týristik orynǵa ainaldy» degen bolatyn.
Odan keiin táýelsiz ekolog Kirill Osin bul óńirge kelgen týristerdiń «jabaiylyǵy» qorqynyshty ekenin jáne tabiǵatty baqylaýsyz «qaskóiler» armansyz aralap, artynan Bozjyrany adam kórgisiz etetinin aityp, dabyl qaqty.
Buǵan deiin Qorshaǵan ortany qorǵaý ministrligi qurylysqa tek qorshaǵan ortany qorǵaý aimaǵynan tys jerde ǵana ruqsat etiletinin málimdegen.
Bozjyra shatqaly Ústirt qyraty aýmaǵynda ornalasqan. Bul jergilikti haiýanattar qoryǵyna engizilgen jáne Qyzyl kitapqa engen janýarlar men qustardyń, sonyń ishinde Orta Aziia barysy mekendeitin orta.
Bozjyrada paleolit dáýirinen erte orta ǵasyrlarǵa deiingi kóptegen arheologiialyq eskertkishter bar.
2022 jyly Mańǵystaý oblysynyń ziialy qaýym ókilderi QR prezidenti Qasym-Jomart Toqaevqa Bozjyra aýmaǵyndaǵy, buǵan deiin halyq arasynda daý týdyrǵan jańa týrizm jobalaryn qoldaityndaryn aityp hat ta jazǵan bolatyn.
