© Photo: Rixabay.com/Karl Reinery
"Tasbolat Oil Korporeishn" JShS qyzmetkerleri kásiporyn basshylyǵynan jalaqyny 100%-ǵa kóterýdi talap etti.
Áleýmettik jelide "Tasbolat Oil Korporeishn" JShS jumysshylarynyń Qasym-Jomart Toqaevqa úndeýi jariialandy. Olar prezidentten kompaniia qyzmetkerleri men basshylyq arasyndaǵy eńbek daýyna aralasýdy ótindi, dep habarlaidy Sputnik Qazaqstan agenttigi lada.kz portalyna silteme jasap.
Kásiporyn jumysshylary ailyqty 100%-ǵa kóbeitýdi talap etip otyr. Qazir ken ornynda jalaqy ortasha eseppen 300 myń teńgeni quraidy.
"Mundai somany eger sen 12 saǵat nemese túngi aýysymda isteseń ǵana tóleidi. Eger ádettegi jumys kúni bolsa, búkil salyqty ustaidy, sonda qolǵa 240-250 myń teńge ǵana alasyń. Bul aqsha jetpeidi. Aqshanyń jartysy otbasyn asyraýǵa ketedi, odan bólek kommýnaldyq qyzmet aqysy, balalardyń kiimi bar, kóbi kredit tóleidi. Kóptegen otbasy – kópbalaly, zeinetkerlerge qaraidy", - deidi ken orny jumysshylarynyń biri.
Onyń aitýynsha, qyzmetkerler kásiporyn basshylyǵyna óz talaptaryn 25 shildede qoiǵan, biraq bitistirý komissiiasynyń otyrysynda jumys berýshi jalaqyny kóterýden bas tartqan.
"Qyrkúiektiń basynda biz energetika ministrligine hat joldadyq. Úsh jaqty komissiia qurý úshin oblystyq kásipodaqqa júgindik. Prezident osy jaǵdaiǵa aralasýy úshin oǵan beineúndeý joldap otyrmyz", - deidi ol.
Aitýynsha, kásiporynda ereýil áli bolmaǵan: 165 adamnyń bári jumysqa turaqty túrde shyǵyp júr. Biraq eger másele sheshilmese, jumysshylar mundai qadamǵa barýǵa daiyn. Al ázirge olar kompaniia basshylyǵy qyzmetkerlerdiń talabyna qulaq asady degen úmitte.
