Foto: facebook.com/edilzh
Mańǵystaý oblysynan sailanǵan Májilis depýtattary Edil Jańbyrshin men Samat Musabaev Astanaǵa kelgen jańaózendik munaishylardyń narazylyǵynan keiin Premer-ministr Álihan Smaiylovqa depýtattyq saýal joldady, dep habarlaidy Sputnik Qazaqstan.
Depýtat Edil Jańbyrshin sońǵy jyldary elimizdiń batysynda munai-gaz kásiporyndarynda qyzmet kórsetetin servistik kompaniialar jumysshylarynyń ereýilderi jiilep ketkenin atap ótti.
"Kúni keshe bir top mańǵystaýlyq munaishy óńirde óz máseleleri sheshilmegen soń, Astanaǵa keldi. Dál osyndai oqiǵa elordada byltyr da bolǵan.
Birneshe servistik kompaniia "Samuryq-Qazyna" qory erejeleriniń talaptarynyń eskirgenin jáne qazirgi jaǵdaiǵa sáikes kelmeitinin buǵan deiin de aityp, shaǵymdanǵan. Alaida Úkimet, "Samuryq-Qazyna", "QazMunaiGaz" jáne jergilikti atqarýshy bilik tarapynan júieli jumystar jasalynbady, tiisti nátije bolmady.
Al Mańǵystaýda jarylaiyn dep turǵan "jara" kóp. Olardy keshendi túrde "emdeýmen" ainalyspasa, daý-damai ári qarai jalǵasyp, ýshyǵa beredi. Úkimet komissiiasyn qurý jóninde sizge hat ta joldadyq. Oǵan áli jaýap bermedińiz. Qashanǵy kózdi jumyp, qulaqty bitep, aýyzdy býyp otyra beresizder. Máseleni sheshetin ýaqyt ótip bara jatyr. Erteń "qolymyzdy mezgilinen kesh sermedik" dep júrmeńizder", - dep ashýlandy Jańbyrshin Premerge depýtattyq saýal joldap.
Aitýynsha, servistik jáne basqa da merdiger kompaniialar biýdjetke salyǵyn tólep, ózderine investitsiia quiyp, halyqty turaqty jumyspen qamtamasyz etýge múddeli. Biraq myna faktorlar – tenderdiń ádiletsiz ótýi, jemqorlyq, tarifterdiń tómendigi, baǵa dempingisi jáne basqa da máseleler oǵan múmkindik bermei otyr.
"Bul óz kezeginde kompaniialardaǵy jalaqy deńgeiiniń tómen bolýyna, áleýmettik paketterdiń tólenbeýine, eńbek qaýipsizdiginiń saqtalmaýyna, tehnikalardyń jańalanbaýyna sebep bolyp otyr. Aita ketetin jait, ótken senbi kúni Aqtaý qalasynda ereýilge shyqqan "BerAli Mańǵystaý Company" mekemesiniń basshylarymen kezdestim, joǵaryda keltirilgen kemshilikterdi olar da aitty. Kompaniianyń resmi ótinishi boiynsha jumystar atqarylyp, quzyrly organdarǵa hat joldandy", - dep málimdedi májilismen.
Depýtattar "Samuryq-Qazyna" qory óz erejelerine mynadai ózgeristerdi shuǵyl túrde engizýi qajet dep esepteidi:
- birinshiden, baǵa dempingisine shekteý qoiý. Mysaly tender kezinde baǵany 10 paiyzdan tómen túsirmeý;
- ekinshiden, servistik kompaniialarmen kópjyldyq kelisim-sharttarǵa otyrý, iaǵni kompaniialar jumysynyń turaqtylyǵyn qamtamasyz etý qajet.
- úshinshiden, tenderge shyǵarylatyn jumystar men qyzmetterdiń qarjy kóleminde eńbekaqy qory jáne áleýmettik paket bólek kórsetilip, ol baǵa oiynyna túspeýi kerek.
"Bul jumysshylardyń durys jalaqy alýyna, áleýmettik jaǵynan qorǵalýyna kepil bolady jáne tenderdi utyp alǵan kompaniialardaǵy jaǵdaidy memlekettik organdar men tapsyrys berýshi tarapynan baqylap otyrýǵa múmkindik týady", - dedi Jańbyrshin.
Budan bólek, depýtattar keshegi daý týǵyzǵan tenderlik protsedýralardy jan-jaqty zerttep, eger kemshilikter anyqtalsa, tiisti sheshim qabyldamaǵan kvazimemlekettik mekemelerdiń laýazymdy tulǵalarynyń jaýapkershiligin qarastyrýdy talap etti.
"Konstitýtsiiaǵa sáikes elimizdiń bailyǵy halyqqa tiesili, iaǵni qazba bailyq turǵyndardyń ál-aýqatyn arttyrýǵa qyzmet etýi kerek. Sondyqtan "Samuryq-Qazyna" qory jáne onyń portfeldik kompaniialary jańasha, ashyq, ádil jumys jasap, halyqtyń turmys-tirshiligin jaqsartýǵa naqty qadamdar jasasyn", - dep túiindedi sózin depýtat.
