QR Tótenshe jaǵdailar ministrliginiń resmi ókili Talǵat Ýáli «Mańǵyshlaq-Aqtóbe» poiyzynyń júk vagonyndaǵy jarylys týraly aityp berdi, dep habarlaidy QazAqparat.
«14 jeltoqsanda tańǵy saǵat 04.30-da Mańǵystaý oblysynyń Tótenshe jaǵdailar departamentine Beineý aýdanynyń aýmaǵynda ornalasqan № 464 aiyryǵy aýdanynda №109 «Mańǵyshlaq-Aqtóbe» jolaýshylar poiyzynyń júk tasymaldaý vagony janǵany týraly aqparat kelip tústi. Bizge belgili málimet boiynsha, jolaýshylar poiyzy 10 vagonnan quralǵan, onyń ishinde 192 jolaýshy bolǵan. Órtengen vagon júk tasymaldaýǵa arnalǵan, ol Qazposhtaǵa tiesili», - dedi Talǵat Ýáli Ministrlikter úiinde tilshilerge bergen suhbatynda.
Oqiǵa saldarynan 5 adamdy kúiik shalǵan – eki jolserik, bir inkassator, bir Qazposhta qyzmetkeri jáne on jasar bala.
«Zardap shekkenderdiń barlyǵy órtengen vagonnyń ishinde bolǵan. Aldyn ala sebep boiynsha, órtke bes litrlik gaz ballonynyń jarylýy sebep bolǵan. Jolaýshylar poiyzynda nemese júk tasymaldaý vagonynda gaz ballonyn alyp júrýge tyiym salynǵan. Bul – ereje buzý bolyp sanalady.
Balanyń júk vagonynda qaidan júrgenin biz aita almaimyz, bul suraqty «Qazaqstan temir joly» kompaniiasyna qoiýy kerek. Biz óz tarapymyzdan balanyń bolǵanyn rastaimyz, Qazposhta qyzmetkeri 10 jasar balasyn ózimen birge alyp júrgen. Barlyǵy túrli dáreje kúiik alyp, Beineý aýdandyq ortalyq aýrýhanasyna jatqyzyldy.
Sonymen birge, QR Tótenshe jaǵdailar ministrligi búlingen júkti qalpyna keltirý, zardap shekkenderge materialdyq kómek kórsetý jáne qylmystyq is qozǵaý máselelerine jaýap bermeitinin, ony Ishki ister miinstrigi men QTJ kompaniiasynan suraý kerektigin aitty.
