Mańǵystaý oblysynda qysqy mal azyǵy úshin 77 myń tonna shóp pen 53 myń tonna jem qajet jáne onyń basym bóligi jetkizildi. Bul týraly Ortalyq kommýnikatsiialar qyzmetinde ótken brifingide óńir ákimi Nurlan Noǵaev baiandady, dep habarlaidy QazAqparat.
«Óńirde qalyptasqan aýa-raiynyń qolaisyzdyǵyna bailanysty tórt túlikti jem-shóppen qamtý máselesi týyndady. Oblys boiynsha qys mezgilinen ótý úshin – 77 myń tonna shóp jáne 53 myń tonna jem daiyndaý qajet. Qazirgi ýaqytta 70 myń tonna shóp jáne 41 myń tonna jem basqa óńirlerden jetkizildi», - dedi N. Noǵaev Ortalyq kommýnikatsiialar qyzmetinde ótken brifingte.
Úkimet rezervinen analyq mal basy úshin azyqqa jumsalǵan shyǵyndardy óteýge 1,9 mlrd teńge qarajat bólingen. Qazir onyń 1,2 mlrd teńgesi igerildi. Iaǵni, iri qara mal basyna 9200 teńge, usaq malǵa – 1900 teńgeden tólem óteýsiz berilgen.
«Prezidenttiń tapsyrmasyna sáikes, Úkimettiń qoldaýymen «Qazaqstan Temir Joly» ulttyq kompaniiasy arqyly jem-shópti tasymaldaý qunyna 75 paiyz jeńildik berildi. Atalǵan temirjol tarifi jyl sońyna deiin uzartyldy. Sonyń nátijesinde oblysqa jem-shóp jetkizý 800 mln teńge ornyna 153 mln teńge tólep otyrmyz. Jáne basqa óńirlerden 3 myń tonnadan astam jem-shóp tegin jetkizildi, ony jeke sharýshylyqtarǵa, muqtaj azamattarǵa taratyp berip otyrmyz», - dedi N. Noǵaev.
