Búgin óńir basshysy Nurlan Noǵaevtyń tóraǵalyǵymen Mańǵystaý oblysyn údemeli indýstriialdy damytý jónindegi óńirlik úilestirý keńesiniń otyrysy ótti. Bul jaiynda oblys ákiminiń baspasóz qyzmetine silteme jasap QazAqparat habarlaidy.
Jiynda keme jasaý jáne keme jóndeý salasyndaǵy investitsiialyq joba qaraldy.
Atap aitqanda, jergilikti kásipker teńiz ailaǵy bar keme jasaý jáne keme jóndeý zaýytynyń qurylysyn josparlap otyr.
Jańa kásiporyn 2025 jyly paidalanýǵa berilýi tiis. Nysan Aqtaý qalasy Ómirzaq aýylynyń aýmaǵynda salynady.
- Qazir kólemi joǵary tonnaj kemeleri bar azamattar jóndeý jumystaryn Resei, Ázirbaijan, Iran siiaqty kórshiles Kaspii mańy elderinde júrgizýge májbúr. Sondyqtan biz atalǵan qyzmetti Mańǵystaýda iske asyryp, óńirdiń biýdjetin tolyqtyrý maqsatynda osy jumysty qolǵa alǵymyz keledi. Joba aiasynda jylyna jalpy syiymdylyǵy 2000 tirkelimdik tonnany quraityn 9-10-nan astam kemege jóndeý júrgizilip, 2 jylda 1-2 keme qurastyrýdy kózdep otyrmyz. Qyzmet biliktilik qoǵamdastyqtarynyń qadaǵalaýymen halyqaralyq standarttarǵa sáikes júzege asyrylady, - dedi «Keme jabdyqtary jáne servis» kompaniiasynyń bas direktory Dmitrii Donskih.
Aita keteiik, zaýyt tolyq iske qosylǵannan keiin 200-ge jýyq adamdy turaqty jumyspen qamtamasyz etedi.
Úilestirý keńesiniń músheleri usynylǵan jobany maquldady.
Oblys ákimi Nurlan Noǵaev júzege asyrylatyn jobalarǵa jergilikti atqarýshy organdar tarapynan qajetti qoldaý kórsetiletinin aitty.
Jiyn qorytyndysy boiynsha óńir basshysy jaýapty tulǵalarǵa birqatar tapsyrma júktedi.
