«Mańǵyshlaq-Aqtóbe» poiyzynyń júk vagonynda órt shyqty, dep habarlaidy "Ult aqparat" TJM baspasóz qyzmetine silteme jasap.
«14 jeltoqsanda tańǵy saǵat 04.30-da Mańǵystaý oblysynyń Tótenshe jaǵdailar departamentine Beineý aýdanynyń aýmaǵynda ornalasqan № 464 aiyryǵy aýdanynda № 109 «Mańǵyshlaq-Aqtóbe» jolaýshylar poiyzynyń júk tasymaldaý vagony janǵany týraly aqparat kelip tústi», - dedi TJM resmi ókili Talǵat Ýáli.
Oqiǵa ornyna TJ departamenti, Apattar meditsinasy ortalyǵy, «QazmunaiTeńiz» MÓQQ jáne «QTJ» kompaniiasynnan barlyǵy 30 adam, 7 tehnika jáne 1 órt poiyzy jiberildi. Órttiń basqa vagondarǵa taralýyna jol bermeý úshin vagony jolaýshylar vagonynan ajyratylǵan.
«Órt saldarynan 5 adam, onyń ishinde 1 bala túrli dárejedegi kúiik alǵan. Barlyq zardap shekkender júk vagonynda bolǵan. Zardap shekkender Beineý aýylyndaǵy ortalyq aýrýhanaǵa jetkizildi», - dedi resmi ókil.
Qazirgi boljam boiynsha órttiń shyǵýyna júk vagonyndaǵy gaz ballonynyń jarylýy sebep bolǵan. Saǵat 07.19-da órt sóndirildi, júk vagony tolyǵymen janyp ketti.
Qazirgi ýaqytta Ishki ister organdary qyzmetkerleri órtengen vagondy qorshady, sondai-aq órttiń mán-jaiyn anyqtaý úshin Mańǵystaý oblysy TJ departamentiniń órt sóndirý zerthanasy jiberildi.
Aita keterligi, saǵat 09.18-te jolaýshylar vagondary Aqtóbe stansasyna attandyryldy.
