Mańǵystaýda balasyn ákesinen alyp ketpek bolǵan anasynyń daýly videosy áleýmettik jelide tarap ketti. Taǵdyry áleýmettik jelide talqyǵa túsip, qoǵamda rezonans týdyrǵan áiel máseleniń mán jaiyn aityp, Mańǵystaý arnasyna suqbat berdi, dep habarlaidy "Ult aqparat".
Sot sheshimimen balalaryn alýǵa kelgen anaǵa úlken uly qarsylyq tanytqan. Videodan keiin kópshilik balanyń anasyn kinálap, máselege tiisti organdardyń aralasýyn talap etken.
Degenmen, burynǵy kúieýimen 13 jyl otasqan Janar Hamzievanyń aitýynsha, sot sheshim shyǵarar kezde onyń áleýmettik-turmystyq jaǵdaiyn eskergen.
Erli-zaiyptylardyń ortaq nekesinen 4 bala bar. Úsheýi ákesiniń tárbiesinde, al kenjesi anasynda.
«Qazir Atyraý oblysynda 8 bólmeli úide ata-anammen birge turamyn. Bir mekemede eden jýyp, saýda-sattyqpen ainalysamyn. Óz kúnimdi kórip, balalarymdy óz qamqorlyǵyma alý úshin ýaqytpen sanaspai jumys isteýge májbúrmin. Al, balalardyń ákesi Orynbasar Óteshbaev dosynyń bergen bir bólmeli qýyqtai úiin panalap, taksi qyzmetin atqarady. Iaǵni, ol jumysta bolǵan kezde balalardyń tárbiesimen Orynbasardyń anasy ainalysady. Sot bolatyn kezde psiholog úlken ulymmen sóilesip, onyń meni jaqsy kóretinin aitty. Biraq ol ákesi men ájesiniń yqpalynan shyǵa almaidy. Bala óz tańdaýyn jasai almai otyr. Keshegi videoǵa bailanysty ýchaskelik politseiler «sen ala alasyń, qolyńda atqarý paraǵy bar» degesin men sondai áreketke bardym. Men balany uryp-soqqan joqpyn. Jurt meni «aqsha kerek bolǵasyn sóitip jasap jatyr» dep jazypty. Maǵan odan eshteńe kerek emes. Aliment te qajet emes», - deidi kelinshek.
Al, Janardyń burynǵy kúieýi Orynbasar Óteshbaev balalaryn anasyna bergisi kelmeitinin aitady. Tipti ákeniń tárbiesinde qalǵan uly men qyzy naǵashylarynyń qolyna barǵysy kelmeitinin jasyrmady.
«Anamyzben birge turǵymyz kelmeidi. Biz naǵashylarymyzdyń qolyna baratyn bolsaq, ol jumys isteimin dep taǵy da qalaǵa ketip qalady. Biz osynda qala beremiz», - deidi Janel Orynbasarqyzy.
Al, Munaily aýdany bilim bólimindegi psiholog aldyn ala jasaǵan boljamy boiynsha, balalar úlkenderdiń aitýymen júr degen pikir bildirdi.
«Biz balalardyń quqyǵyn qorǵaityn organbyz, biraq balalardy anasynan aiyryp quqyǵyn qorǵamaimyz. Kóp jaǵdaida bala anasymen birge bolýy kerek. Anasy balalarynyń keýdesinen iterip turǵan joq. Sot bolardan bir kún buryn keldi. Qushaqtaiyn dese, balalar barǵysy kelmedi. Sonda psiholog maman jasaǵan qorytyndyda balalarǵa úlkenderdiń yqpaly áser etkeni jazylǵan. Balalardyń qylyǵy jattandy, úiretýli», - deidi Munaily aýdandyq bilim bólimi kámeletke tolmaǵan balalardyń quqyǵyn qorǵaý mamany Altynai Esbergen.
Esterińizge sala keteiik, buǵan deiin mańǵystaýlyq áiel burynǵy kúieýiniń qolyndaǵy balalaryn kúshtep alyp ketpek bolǵany jaily video áleýmettik jelide tarap ketkenin jazǵan bolatynbyz.
Oqiǵa 2 qazan kúni Basqudyq aýylynda bolǵan. Kelinshek burynǵy kúieýiniń sot sheshimine qaramastan balalardy bermei otyrǵanyn aityp politsiiaǵa júginedi. Kámeletke tolmaǵandar isteri jónindegi inspektor, sondai-aq ýchaskelik inspektordyń kómekshisi balalardyń turǵylyqty jerine bardy.
Alaida, shý shyǵyp, nátijesinde úsh bala ákesimen birge qalǵan.
