Mańǵystaý oblysy Túpqaraǵan aýdanyna qarasty Saiyn Shapaǵatov aýylynyń turǵyndary buralqy itterdiń mal-jandy qaýyp, turǵyndardyń ómirine qaýip týdyryp otyrǵanyna shaǵymdanyp, ákimdiktiń aldyna jinaldy, dep habarlaidy QazAqparat.
«Itter birneshe eshkimdi jedi. Mal úshin kelip turǵan joqpyn. Bular adamǵa qaýip týdyryp otyr. Kórshi balany jaraqattady. Adamdy talap jatyr. Myna halyqtyń jan aiqaiyn kim oilaidy?! Itti joq qylý kerek. It atpaidy degen – sumdyq. Bul itter úiden shyqqan itter emes, kósheniń itteri. Qaladan ákelip tógip ketip otyr. Itti atýǵa buryn zań boldy ǵoi, sony qaityp engizsin», - dedi aýyl turǵyny Asyltas Qýatbaeva.
Qazir Saiyn Shapaǵatovta 700-den astam buralqy it júr. Turǵyndar oqý jyly bastalǵansha itterdi azaityp, halyqtyń qaýipsizdigin qamtamasyz etýin talap etip otyr.
«Bizde japa-tarmaǵai burynǵydai kóshege shyǵyp it aýlaý degen joq. 2022 jyldyń naýryz aiynan bastap zańǵa ózgeris engizildi. Biraq, turǵyndardyń talap, aryz, ótinishteri boiynsha it aýlaý jumystary júrip jatyr. Bir aptanyń shamasynda turǵyndardan 30 shaǵym tústi. Túpqaraǵan aýdandyq veterinariia stantsiiasy bizge dári-dármek beredi. Dál qazir qolymyzda dári joq. Jýyrda alyp kelemiz», - dedi aýyl ákimi Sairan Qylysh.
