Mańǵystaý oblysynda 100-ge jýyq adam aýrýhanalarda karantinde jatyr, dep habarlaidy "Ult aqparat".
Bul týraly oblystyq densaýlyq saqtaý basqarmasynyń basshysy Ánýar Saǵymbaev málimdedi.
Qazir aimaqta indettiń aldyn alý maqsatynda keshendi sharalar jasalyp jatyr. 70 tósek infektsiialyq aýrýlardy qabyldaýǵa, 280 tósek provizorlyq tekserý jasaý úshin, 600-ge jýyq tósek karantinge jatqyzýǵa daiyn. 400-dei turǵyn tekserilip, karantinnen shyqty.
«Keshe túnde 70 jýyq QR azamaty Ystambuldan Aqtaýǵa ushyp keldi. «Tájen» shekaralyq baqylaý beketi arqyly Ózbekstannan 14 Mańǵystaý oblysynyń turǵyny keldi. Barlyǵy tekserilip, arnaiy kóliktermen Aqtaýǵa jetkizilip, karantinge jatqyzyldy. Saraptama qorytyndysy teris nátije bergen jaǵdaida úilerine karantinge jiberiledi»,-dedi Ánýar Saǵymbaev.
Óńirdiń bas dárigeri aimaqqa kelgen kez-kelgen turǵyn áýejaida, temirjol vokzaldarynda, avtojoldarǵa qoiylǵan beketterde meditsinalyq tekserýden ótip, dene qyzýy ólshenetinin aityp ótti.
«Ár aimaqta adam aǵzasynan Covid-19 infektsiiasyn anyqtaityn virýsologiialyq zerthana bar. Oblysta saraptama jasaityn quraldar jetkilikti mólsherde. Barlyǵy tegin jasalady»,-dedi ol.
