Aqtaý qalalyq soty Mańǵystaý oblysynyń densaýlyq saqtaý basqarmasynyń basshysy Jamal Jamanbaevaǵa qatysty qylmystyq is boiynsha úkim shyǵardy, dep habarlaidy "Ult aqparat".
Sotta anyqtalǵandai, J.Jamanbaeva Mańǵystaý oblysynyń densaýlyq saqtaý basqarmasynyń basshysy bolǵan ýaqytta belgilengen laýazymdyq mindetteri men shekteýlerge qarsy áreket ete otyryp, 2020 jyly tamyz aiynda «Covid-19» infektsiiasynyń respýblika aýmaǵynda keń taralýyna sai, tiisti qarjy bólinbesten buryn, 222 000 000 teńgege «Sentropharm» JShS-men 6 dana jyljymaly rentgen apparattaryn bir kózden satyp alý týraly shart jasasqan. Apparattardy satyp alý úshin 2020 jylǵy biýdjettik josparǵa naryqtyq qunynan joǵary baǵamen biýdjettik ótinim daiyndap, oblystyq maslihatqa meditsinalyq jabdyqtardy satyp alý úshin qarjy bólý týraly usynys bildirgen. Nátijesinde qalalyq maslihattyń sheshimimen atalǵan qarjy bólingen.
Alaida memlekettik mekemelerdi materialdy-tehnikalyq qamtamasyz etý talaptaryna sai oblystyq qazynashylyq departamentinen kelisimshart tirkeýden ótpegen.
Osydan soń J.Jamanbaeva baǵynyshty meditsinalyq mekemeler arqyly satyp alý maqsatynda aýdandyq emhana direktorlaryna «Sentropharm» JShS-men jyljymaly rentgen apparattaryn bir kózden satyp alý tásilimen kelisimshart jasaýdy talap etken.
Osylaisha J.Jamanbaeva árbir jyljymaly rentgen apparattaryn zańsyz joǵary baǵamen satyp alýǵa yqpal etý arqyly memleketke barlyǵy 29 540 000 teńge zalal keltirgen.
Sottalýshy sotqa deiingi tergep-tekserý kezinde kinásin moiyndap, keltirilgen shyǵyndy ótep, kináni moiyndaý týraly mámile nysanyndaǵy protsestik kelisimge kelgen.
Basty sot talqylaýynda sottalýshy kináni moiyndaý týraly protsestik kelisimdi tolyqtai qoldaitynyn jáne is boiynsha jinaqtalǵan dáleldemelerdi daýlamaitynyn aitty.
Sot jaza taǵaiyndaý kezinde sottalýshynyń kámeletke tolmaǵan balalarynyń baryn, jumys ornynan jaǵymdy minezdemesin qylmystyq jaýaptylyq pen jazany jeńildetetin mán-jailar retinde qabyldady.
Sot úkimimen J.Jamanbaeva QR QK-niń 361-baby 4 bóliginiń 3) tarmaǵymen kináli dep tanylyp, sýdia qyzmetin, jergilikti ózin-ózi basqarý organdarynda, Qazaqstan Respýblikasynyń Ulttyq bankinde jáne onyń vedomstvolarynda, qarjy naryǵy men qarjy uiymdaryn retteý, baqylaý jáne qadaǵalaý jónindegi ýákiletti organda, memlekettik uiymdarda jáne kvazimemlekettik sektor sýbektilerinde laýazymdardy atqarý quqyǵynan ómir boiyna aiyra otyryp, 3 jyl 6 ai merzimge bas bostandyǵyn shekteý jazasy taǵaiyndaldy.
