Mańǵystaý oblysynda arnaiy operatsiia barysynda ustalǵan ártúrli qylmystyq toptardyń 9 múshesine adam óltirý, uiymdasqan qylmystyq top qurý, bopsalaý jáne taǵy basqa baptar boiynsha aiyp taǵylýda, habarlaidy QazAqparat tilshisi.
«31 shilde kúni Aqtaý qalasynyń mamandandyrylǵan tergeý soty sotqa deiingi tergeý organdary 9 tulǵaǵa qatysty belgilegen eki aiǵa «kúzetpen ustaý» túrindegi bultartpaý sharasyn sanktsiialaǵan bolatyn. Onyń ishinde 6 tulǵa QR QK-niń 24-baby 3-bóligi (Qylmysqa daiyndalý jáne qylmysqa oqtalý), 99-baby 2-bóliginiń 7-tarmaǵy (Adam óltirý), 2 tulǵa QR QK-niń 262-baby 1-bóligi (Uiymdasqan top, qylmystyq uiym qurý jáne olarǵa basshylyq etý, sol siiaqty olarǵa qatysý), 194-baby 4-bóliginiń 1-tarmaǵy (Qorqytyp alý), taǵy 1 tulǵa QR QK-niń 194-baby 4-bóliginiń 1-tarmaǵy boiynsha kúdik bolyp otyr», - dedi Mańǵystaý oblystyq sotynyń baspasóz qyzmetinen.
Vedomstvodan málim etkendei, atalǵan tulǵalarǵa qatysty sot qaýlylary zańdy kúshine engen joq jáne iske qatysýshylar apelliatsiialyq tártipte aryz túsire alady.
Eske salsaq, 29 shilde kúni Ulttyq qaýipsizdik komiteti Ishki ister ministrligimen birlesip, Mańǵystaý oblysynda qylmystyq top músheleriniń zańǵa qaishy is-áreketiniń jolyn kesý boiynsha aýqymdy arnaiy operatsiia ótkizgen bolatyn.
Nátijesinde Jańaózen qalasy men Munaily aýdanynda bir mezgilde ártúrli tórt qylmystyq toptan 17 adam ustaldy. Onyń ishinde 8 adam sot sheshimimen eki ai merzimge qamaýǵa alyndy.
Qylmystyq toptardyń múshelerinen 3 tapansha, dybysty báseńdetetin 1 qural, 8 sholaq ańshy qarýy, 1 «Saiga» karabini, usaq kalibrli 1 vintovka, 5 travmatikalyq tapansha, 218 dana oq-dári, túrli sýyq qarýlar (pyshaqtar, kastetter jáne t.b.) tabylyp, aiǵaq zat retinde tárkilendi
