Foto: videodan skrinshot
Oqiǵa 23 shilde kúni tańǵy saǵat 6:00 shamasynda Qaraqiia aýdanynyń mektebinde bolǵan. Jazǵy demalys kezeńine sáikes, ǵimaratta eshkim bolmaǵan. Aldyn ala málimet boiynsha, qulaǵan aýmaq shamamen 250 sharshy metrdi quraidy, dep habarlaidy Ult.kz.
Qaraqiia aýdanynyń bilim bólimi habarlaǵandai, bul mektep 2009 jyly paidalanýǵa berilgen. Qazirgi tańda onda 1400-den astam oqýshy bilim alady.
«Tańǵy ýaqytta akt zalynyń tóbesinen beton konstrýktsiia qulap tústi. Qazir tiisti tekserýler men tehnikalyq saraptama júrip jatyr. Qorytyndy áli daiyn emes, biraq aldyn ala málimetke sáikes, zardap shekkender joq», – dedi aýdandyq bilim bóliminiń ókili.
Zaqym tek akt zalyna ǵana kelgen. Mekteptiń basqa bólikteri, sonyń ishinde oqý kabinetteri qalypty jaǵdaida.
Eger jóndeý jumystary 1 qyrkúiekke deiin aiaqtalmasa, oqýshylardy ýaqytsha basqa mektepterge ornalastyrý máselesi qaralady.
«Mektep ǵimaratyna berilgen kepildik merzim aiaqtalǵan. Bar kúshimizdi salyp, jańa oqý jylyna deiin bárin qalpyna keltirýge tyrysamyz», – dedi bólim ókilderi.
Qazir oqiǵa boiynsha arnaiy komissiia quryldy. Qulaý sebepteri tehnikalyq saraptamadan keiin jariialanady.
Oqiǵa ornyna oblys ákiminiń birinshi orynbasary Erbol Izbergenov baryp, jaǵdaimen tanysty.
