Mańǵystaý oblystyq ekologiia departamentine óndiris oryndary aýmaǵyndaǵy 12 túrli lastaýshy kózderdi anyqtaityn drondar satyp alynady. Bul týraly QR Ekologiia, geologiia jáne tabiǵi resýrstar ministrliginiń Facebook paraqshasyndaǵy tikelei efirde óńirlik departamenttiń direktory Rýslan Tókenov aitty, dep habarlaidy "Ult aqparat".
«Ekologiia departamentine sońǵy úlgidegi dron satyp alynyp jatyr. Ol 12 túrli lastaýshy kózderdi onlain rejimde anyqtai alady. Jeti shaqyrym radiýsta, úsh jarym shaqyrym biikke ushyrýǵa bolady. Video, fotofiksatsiiasy bar. Qazir atalǵan qurylǵy satý-satyp alý protsesinen ótip jatyr. Keler jyldan bastap qoldanysqa engizemiz. Drondardy kóbine ónerkásip kásiporyndarynyń aýmaǵynda, zaýyttardyń, ken oryndarynyń tóńireginde paidalanamyz. Erekshe qorǵalatyn tabiǵi aýmaqtarda dron qoldanylmaidy», - dep atap ótti Rýslan Tókenov.
Aita keteiik, biyl Mańǵystaý oblysy boiynsha kásiporyndarǵa qorshaǵan ortaǵa keltirgen ziiany úshin 2,8 mlrd teńge aiyppul salynyp, onyń 90% -y óndirilgen. Rýslan Tókenov óńirdegi ekologiialyq máselelerdi sheshý boiynsha bekitilgen Jol kartasyna keńinen toqtaldy.
«Jol kartasy jeti taraýdan, otyz alty bólimnen turady. Shyǵaryndylardy azaitý, kógaldandyrý, qaldyqty basqarý, tarihi lastaný oryndaryn retteý, bioalýantúrlilikti qorǵaý jáne taǵy da basqa ekologiialyq máselelerdiń bári osy qujatqa engizilgen. Ministrdiń tapsyrmasy boiynsha, biz toqsan saiyn jergilikti halyqpen kezdesip, atqarylǵan jumys boiynsha esep berip otyramyz. Onda sheshilgen máselelerdi, sheshimin tappaǵan dúnielerdi baiandap, sebebin de túsindiremiz», - dedi departament basshysy.
Jaqynda Qazaqstannyń Qyzyl kitabynyń sirek kezdesetin jáne joiylyp ketý qaýpi bar janýarlar tizimine engizilgen Kaspii itbalyǵynyń ahýaly da suhbatqa arqaý boldy.
«Kaspii jaǵalaýynan keide óli itbalyqtardyń tabylyp jatady. Kóp jaǵdaida buǵan itbalyqtyń brakoner aýyna oratylyp qalýy sebep bolady. Biyl ákimdiktiń qatysýymen teńizdegi biraz jer zańsyz aýdan tazartyldy. Eger bul jumys jalǵassa, oń nátije bolatyny sózsiz. Al itbalyqtyń Qyzyl kitapqa enýi bizge jańadan erekshe qorǵalatyn aimaq qurýǵa múmkindik beredi», - dep atap ótti R.Tókenov.
Óńirdegi qoqys problemasy týraly aitylǵanda sońǵy ýaqytta jurtshylyq talqysyna túsip jatqan Bozjyra shatqalynyń tazalyǵy da nazardan tys qalmady.
«Esep boiynsha biyl Bozjyraǵa 2 000 adam barǵan. Onyń árqaisysynda ózderimen bir bótelke sý boldy desek, jartysy sanaly túrde bos bótelkesin alyp ketedi. Qalǵan myńynan qaldyq sý jerde qalady. Aldaǵy jyly shatqalǵa on myń týrist keledi dep boljanyp otyr. Iaǵni, biz qoqys máselesin qazirden rettep, ony tastaityn oryndardy daiyndap, qonaq úi salatyn investorǵa mindet júkteýimiz qajet. Jalpy qonaq úi Bozjyra shatqalynan alys ornalassa, ekologiialyq talap oryndalsa, joba daiyn bolǵanda halyqqa tanystyrylsa, sonymen qatar ainalada kieli oryndar bolǵandyqtan túngi mezgilde tynyshtyq rejimi saqtalsa bul jobaǵa jurtshylyqtyń bári birdei qarsy emes», - deidi departament basshysy.
Suhbat kezinde 105 mln tonna radiatsiialyq qaldyq tógilgen Qoshqar ata qaldyq qoimasy, Shetpe mańyndaǵy karerler, ekologiialyq mádeniet, jańa Ekologiialyq kodekstiń jergilikti jerdegi ahýaldy jaqsartýǵa tigizetin septigi jáne taǵy da basqa qordalanǵan problemalar sóz boldy.
Ministrliktiń baspasóz qyzmeti salalyq komitetter men departamentter, vedomstvalyq mekemeler ókilderimen mańyzdy máseleler jóninde tikelei efirlerdi dástúrli túrde kún saiyn ótkizip otyrady.
