Foto: inaktau.kz
Mańǵystaý oblysynda 5 ai buryn joǵalǵan úsh balanyń anasy aman-esen tabyldy, dep habarlaidy Sputnik Qazaqstan portaly.
Jániia Abdýllaevany politsiia maiory Nurjan Jaqypov taýyp alǵan.
"14 qańtarda saǵat 12:00 shamasynda shaǵyn aýdandaǵy 4-shi úide ornalasqan "Viktoriia" qonaqúiine áriptesim Jandos Áýelbekov ekeýmiz sheteldik azamattardy tekserýge bardyq. Tekserý barysynda sol jerdiń ákimshiligimen sóilesip, Jániia Abdýllaevanyń sýretin kórsettik. Ákimshi "4-5 kún boldy osy áielge uqsas bir kisi aspazdyń kómekshisi bolyp bizge ornalasty" dedi", - deidi politsei.
Politsei jaqyndap, sózge tartqanda áiel eńirep jylap jibergen.
"Amandasa salǵanymyz sol edi, ol otyra qalyp jylap jiberdi. Aitýynsha, kúieýimen renjisip ketip qalǵan. "Baratyn jerim joq, áke-shesheme barsam, olar meniń ózime qarsy shyǵady", dedi Jániia", - deidi politsiia maiory.
Jániia Abdýllaeva úsh balasyn enesine qaldyryp ketip qalǵan.
Nurjan Jaqypovtyń aitýynsha, 13 jyl tájiribesinde mundai otbasylyq kikiljińdi óte kóp kórgen. Biraq burynǵyǵa qaraǵanda otbasyn tastap, joǵalyp ketetinder sany azaiǵan.
Eske sala ketsek, Beineý aýylynyń turǵyny 27 jastaǵy Jániia Abdýllaeva 29 qyrkúiekte joǵalyp ketken bolatyn. Týystary ol Aqtaýǵa ketýi múmkin dep boljady. Politseiler áiel joǵalǵan kúni Beineý-Mańǵystaý poiyzyna bilet satyp alǵanyn anyqtady. Kelinshek aýrýhanada jumys istegen.
Oǵan oblys, tipti respýblika kóleminde izdeý jariialanǵan edi.
