Mańǵystaý oblysynda oqý jyly bastalǵaly 3 oqýshy men 1 muǵalim koronavirýs juqtyrǵan. Bul týraly Mańǵystaý oblysy Taýarlar men kórsetiletin qyzmetterdiń sapasy men qaýipsizdigin baqylaý departamenti epidemiologiialyq bóliminiń bastyǵy Berdibek Qaraitaev málim etti, dep habarlaidy "QazAqparat".
«Tapsyrǵan testilerinen koronavirýs infektsiiasy rastalǵan eki oqýshy qashyqtan oqidy. Taǵy bireýi №29 orta mektepte oqidy. Oqýshy qazir karantinde. Ol oqyǵan kezekshi synyp oqýshylary da karantinge jiberildi. Balamen bailanysta bolǵan barlyq adamnan karantinde otyrǵan 7-kúni COVID-19-ǵa analiz tegin alynady. Olardyń test qorytyndylary taza shyqsa, mektepke jiberiledi. Sondai-aq, Munaily aýdanyndaǵy mektepte aǵylshyn tili muǵaliminen koronavirýs anyqtaldy. Oqytýshymen bailanysqa túskenderdiń barlyǵy tekserýden ótedi», - dedi Berdibek Qaraitaev.
Onyń aitýynsha, eger bala sýyq tiip nemese tumaýmen aýyrsa mektepter men balabaqshalardyń ákimshiligi COVID-19-ǵa PTR-testiniń anyqtamasyn talap etýge quqyly emes. Biraq, ata-ana balasynan koronavirýs belgisin kórse, onda emhanada ýchaskelik dárigerden PTR-testini tegin tapsyrýyn talap ete alady.
Oblystyq Bilim basqarmasynyń málimetinshe, eger bir bala koronavirýs infektsiiasyn juqtyrsa, synypta karantin jariialanady. Biraq mektep jumysyn jalǵastyra beredi. Bul sharalar sanitarlyq talaptarǵa sáikes qabyldanady.
Mańǵystaý oblysynda pandemiia bastalǵaly 43 oqýshy men 23 muǵalim qaýipti indetti juqtyrǵan.
