Aqtaýlyq bloger Azamat Sársenbaev kvadrakoptermen túsirgen qoqiqazdar videosyn jariialady.
"Ókinshke orai, olarǵa jaqyndaýǵa múmkindik joq, infraqurylym joq, arnaiy kórý alańqailary joq, jalpy eshteńe joq...
Negizinde Qarakól Mańǵystaýdaǵy erekshe jer, qalasań ony ornitologiia mekkesine ainaldyryp jiberýge bolar edi, mysalǵa Dýbaidaǵy Ras-al-Hor qoryǵy sekildi. Alaida barymyz osy", - dep jazdy Azamat Sársenbaev óz akkaýntynda.
Eko-belsendi Sáken Dildahmettiń aitýynsha, qustyń bul túri Qazaqstannyń Qyzyl kitabyna engizilgen jáne álemde onyń 10-nan astam túri kezdesedi.
«Qoqiqazdar bizdiń elge Afrika, Túrikmenstan, Aýǵanstan elderinen ushyp keledi. Sáýir aiynda kelip, kún sýytqansha (qyrkúiek, qazan ailaryna deiin) bolady. Qoqiqazdardyń elordaǵa jaqyn jerdegi negizgi mekeni Qorǵaljyn qoryǵy, olarda sonda mekendep, kóbeiedi. Mamandardyń aitýynsha, elimizge jyl saiyn 100 myńǵa jýyq qoqiqaz ushyp keledi eken. Onyń ishinde Aqmola, Qostanai, Jambyl jáne Mańǵystaý oblysynyń aýmaǵyn mekendeidi. Taldykólge kelsek, mamandardyń málimdeýinshe, munda kishi jáne úlken 100-den astam qus mekendeidi. Onyń qatarynda qoqiqaz, aqqý, qaz, úirek, shaǵala, birqazan jáne taǵy basqa qustar bar. Taldykólge kelgen bul qoqiqazdyń biylǵy balapandary. Olar jyly jaqqa ushpas buryn osyndai kól men kólshikterge toqtap, ál jinap, odan ári ushady», - deidi Sáken Dildahmet.
