«Mańǵyshlaq-Aqtóbe» jolaýshylar poiyzynyń júk tielgen vagonynda bolǵan órtten zardap shekkenderdiń biri aýrýhanada kóz jumdy, dep habarlaidy "Ult aqparat".
Beineý aýdandyq ortalyq aýrýhanasynyń bas dárigeriniń mindetin atqarýshy Ásiia Shontybaevanyń aitýynsha, denesiniń 80 paiyzyn kúiik shalǵan 42 jastaǵy er adam keshe aýrýhanada qaitys bolǵan.
«Onyń jaǵdaiy óte aýyr bolǵandyqtan, sanaviatsiiamen Aqtaýǵa alyp ketýge jaramady. Sondyqtan ol aýdandyq aýrýhananyń jansaqtaý bóliminde qaldyryldy. Dárigerlerdiń jiti baqylaýynda boldy. Degenmen aýyr jaraqaty saldarynan keshe kóz jumdy», - dedi ol.
Mańǵystaý oblysy Densaýlyq saqtaý basqarmasynyń málimetinshe, qalǵan zardap shegýshiler iaǵni 4 adam meditsinalyq mekemelerde em qabyldap jatyr. Denesiniń 40 paiyzyn kúiik shalǵan er adam men onyń 11 jasar uly Mańǵystaý oblystyq aýrýhanasyna jatqyzylǵan.
«Er adamnyń jaǵdaiy aýyr. Ol ókpeni jasandy jeldetý qurylǵysyna qosyldy. Al, denesiniń 50 paiyzy jaraqattanǵan balanyń beti beri qarady. Azdap sóileidi. Esin biledi», - dedi oblystyq Densaýlyq saqtaý basqarmasynyń baspasóz qyzmetinen.
Qaiǵyly oqiǵadan keiin Beineý aýdandyq aýrýhanasynyń hirýrgiialyq bólimshesinde bolǵan taǵy eki naýqas sanaviatsiiamen oblystyq travmatologiialyq bólimshege aýystyryldy.
«Olardyń jaǵdaiy turaqty dep baǵalanǵan. Osy aptada 23 nemese 24 jeltoqsanda olardy úilerine jiberý josparlanýda», - dep habarlady vedomstvonyń baspasóz qyzmetinen.
Aita keteiik, 14 jeltoqsan kúni tańǵy saǵat 04.30-da Mańǵystaý oblysynyń Beineý aýdanynyń aýmaǵynda № 109 «Mańǵyshlaq-Aqtóbe» jolaýshylar poiyzyna tirkelgen júk vagony órtendi.
QR Tótenshe jaǵdailar ministrliginiń málimetinshe, júk vagonynda gaz ballony jarylǵan. Saldarynan 5 adamdy kúiik shaldy – eki jolserik, bir inkassator, bir Qazposhta qyzmetkeri jáne on jasar bala. Olardyń barlyǵy júk vagonynda boldy.
«Balanyń júk vagonynda qaidan júrgenin biz aita almaimyz, bul suraqty «Qazaqstan temir joly» kompaniiasyna qoiýy kerek. Biz óz tarapymyzdan balanyń bolǵanyn rastaimyz, Qazposhta qyzmetkeri 10 jasar balasyn ózimen birge alyp júrgen. Barlyǵy túrli dáreje kúiik alyp, Beineý aýdandyq ortalyq aýrýhanasyna jatqyzyldy», - degen bolatyn QR TJM resmi ókili Talǵat Ýáli.
