Úlken Almaty kólinde mánerlep syrǵanaýmen tanylǵan almatylyq mánerlep syrǵanaýshy Kseniia Pankratova bul joly Soltústik Qazaqstan tabiǵatynyń sulýlyǵyn kórsetti. Ol Pavlodar oblysynyń ońtústigindegi Baianaýyl ulttyq parkiniń aýmaǵynda ornalasqan Jasybai kólinde syrǵanady, dep habarlaidy "Ult aqparat".
Bul joly ol shleifi uzyn kók kóilekpen mánerlep syrǵanap, jeli qoldanýshylaryn taǵy bir qýantty.
«Soltústik Qazaqstandaǵy Pavlodar mańy – tańǵajaiyp jer. Mindetti túrde jazda taǵy kelemin. Bul bir umytylmas sapar boldy: ádemi tabiǵat, qonaqjai adamdar jáne telegei-teńiz jarqyn emotsiia! Bizdiń jumysymyzdy baǵalaisyzdar dep úmittenemin. Búkil álemge What is Kazakhstan-dy birge kórseteiik!» – dep jazdy mánerlep syrǵanaýshy Instagram paraqshasynda.
Onyń aitýynsha, bul biylǵy jyldyń eń qiyn túsirilimderiniń biri bolǵan.
«Muzdyń qalyń bolǵanyna qaramastan, kóldiń beti sý. Kóilegimniń etegi ábden sý bolyp, salmaǵy 10 kelige bardy, al qatty soqqan jel meni artqa tartyp, kóilegim tap bir parashiýtke ainaldy. Sóitip alǵa júrýim qiyndady. Biraq beineroliktiń sońynda kóilekten shashyraǵan tamshylardy aitsańyzdarshy, bul – meniń súiikti sátim...», – dedi Kseniia.
Osy posttyń astynda jeli qoldanýshylary emotsiiasyn bólisip, tańdanysyn jasyrmady:
«Wow, it's amazing. Joǵary deńgeide. Sondai ádemi. Tańǵajaiyp tabiǵat, ǵajaiyp Ksiýsha. Óte ádemi jer. Keremet» dep jazdy olar.
Jyl basynda Kseniia Pankratova muz qatqan Qapshaǵai sý qoimasynda qyzyl kóilekpen syrǵanap, jeli qoldanýshylarynyń kózaiymy bolǵan edi.
Aita ketý kerek, 2018 jyly jeltoqsanda sportshy, bapker Kseniia Pankratova Úlken Almaty kólinde mánerlep syrǵanap, kópshiliktiń kóńilinen shyqqan edi.
23 jastaǵy sport sheberine kandidat, figýrist Kseniia Pankratova sporttaǵy mansabyn aiaqtaǵanyn aitty. Qazir ol bapkerlikpen ainalysady.
